Бојата од фасадата на Министерството за култура останува да сведочи за борбата на граѓан(к)ите за правна држава како основен мотив на Шарената револуција. Отстранувањето на шарените траги не е приоритет за новиот министер за култура, Роберт Алаѓозовски.
„Таква интервенција, воопшто не е приоритет, наспроти сите проблеми коишто ги наследуваме. Шарената фасада е дело на слободниот дух на граѓаните, на една културна револуција пред сè. Таа фасада во нејзината денешна форма, претставува и една мала историја. Подоцна ќе разговораме во каква форма ќе ја оставиме фасадата на објектот. На зградата ѝ е потребно кречење и обновување на работниот простор. Надворешноста, засега, е сосема во ред“, е ставот на Алаѓозовски.
Од денеска, и на официјалната Фејсбук страница на Министерството за култура, како насловна е поставена фотографија од „шарената“ фасада на Министерството. Претходно, на тоа место беше фотографија од контроверзната Триумфалната порта, која чини 6.248.520 евра или колку „лечењето на 208 Тамари“. Симболика која шарените револуционери ја користеа за да посочат на апсурдноста од изградба на толку скап споменик во време кога поради не одобрени средства од Министерството за здравство, животот го изгуби малата Тамара Димовска.
Министерството за култура беше обоено во април минатата година, како дел од активизмот на Шарената револуција. Целта на боењето на дел од државните институции беше, како што постојано потсетуваа активистите, сивите бетонски згради кои беа дел од проектот „Скопје 2014“ и кои сведочеа за криминалот, корупцијата и притисокот на тогашната власт, конечно да добијат некаква смисла и боја. Шаренилото имаше за цел да ја претстави Македонија во нејзиното вистинско светло, како земја која соединува различности, а не поделена на „предавници“ и на „патриоти“, како што сакаше да ја претстави ВМРО-ДПМНЕ.
Покрај Министерството за култура, бојата сè уште стои и на фасадата на Министерството за финансии. Иако пред два дена, беа поставени скелиња за чистење на фасадата, за кратко време, по коментарите на социјалните мрежи дека дамките треба да останат како потсетување на корумпираноста, неодговорноста и деструктивноста на едно владеење, скелињата беа отстранети. Како што потврди за ЦИВИЛ Медиа, професорот Бранимир Јовановиќ, кој е дел од тимот на министерот за финансии, „бојата останува“!
Шарената револуција за време на неколку месечните протести ги обои фасадите на Собранието и на Владата, Министерството за правда, Министерството за надворешни работи, Триумфалната порта, УЈП, ДИК, Агенцијата за аудио и аудиовизуелни медиуми, Народната канцеларија на претседателот Иванов, дел од спомениците поставени како дел од „Скопје 2014“…
Најголем дел од овие институции, кратко по боењето, во обид да се прикријат трагите од најмасовните протести против владејачката гарнитура, ја отстранија бојата од фасадите на објектите.
Марија Теговска
