Квалитетот на воздухот во Скопје повторно е на загрижувачко ниво. Според најновите податоци на глобалната платформа IQAir, главниот град денеска бележи AQI индекс од околу 170, што спаѓа во категоријата „нездраво“ загадување на воздухот.
Скопје втор ден по ред е најзагаден град во Македонија, на 20 место во светски рамки и втор ви Европа по загаденост.
Најголем проблем претставуваат фините ПМ2.5 честички, чија концентрација изнесува приближно 63 микрограми на кубен метар. Оваа вредност е повеќекратно над годишната препорака на Светската здравствена организација, која изнесува 5 µg/m³. ПМ2.5 честичките се особено опасни бидејќи продираат длабоко во белите дробови и се поврзуваат со зголемен ризик од респираторни и кардиоваскуларни заболувања.
Според IQAir, кога AQI индексот е над 150, загадувањето не претставува ризик само за чувствителните групи, туку може да има негативно влијание врз здравјето на целото население. Во вакви услови се препорачува ограничување на физичките активности на отворено, особено за деца, повозрасни лица и хронично болни.
Прогнозите укажуваат дека во наредните денови е можно привремено подобрување, со вредности што би се движеле во зоната на „умерено“ загадување. Сепак, експертите предупредуваат дека зимскиот период традиционално носи високи нивоа на аерозагадување во Скопје, поради грејната сезона, густ сообраќај и географските карактеристики на котлината, кои го отежнуваат проветрувањето на воздухот.
Скопје и понатаму останува меѓу градовите со највисоко загадување во регионот, а податоците на IQAir редовно го позиционираат и на светските листи на најзагадени урбани средини, особено во текот на зимските месеци.
Надлежните институции и локалните власти повторно се повикуваат да преземат поефикасни мерки за намалување на загадувањето, додека граѓаните се советуваат редовно да го следат квалитетот на воздухот и да ги прилагодуваат своите дневни активности според актуелните вредности.
