Во тензична атмосфера, со меѓусебни препукувања на релација ВМРО-ДПМНЕ – СДСМ, се одвива денешната седница на македонското Собрание, посветена на работата на Јавниот обвинител, Марко Зврлески. Според власта, Зрлевски треба да биде разрешен, поради непрофесионалното работење, затоа што многу предмети ги чувал неотворени, сѐ уште во фиока… Но, според пратениците од ВМРО-ДПМНЕ, власта сака да го разреши Зврлевски, само затоа што го презел предметот „Поткуп“, во којшто главен обвинет е премиерот Зоран Заев, како поранешен градоначалник на Струмица.
Додека во жешка атмосфера се одвива парламентарната битка за смена на Зврлевски, членовите на „Левица“, Мариглен Демири и Здравко Савески, за ЦИВИЛ Медиа, говорат за драмата што ја поминуваат сè уште, низ лавиринтите на македонското судство, од моментот на поднесување кривични пријави, како демонстранти во Шарената револуција и учесници во настанот на 13 април, 2016 година, кога беше демолирана канцеларијата на претседателот, Ѓорѓе Иванов.
„Обвинителството е нефункционално и бавно во извршување на своите обврски. Една година сум по судови, а Обвинителството три пати не можеше да ги обезбеди доказите. И тоа не случај само со мене, туку со многу други луѓе, кои страдаат од таквата нефункционалност. Самото пореметување на правосудниот систем на Македонија, под водство на Зврлевски, ја наметнува потребата од промена на обвинителот, институција која што со својот интегритет, дигнитет и професионалност, ќе ја крене границата на критериум и квалитет. И кога неговите колеги коишто сега се распашани, ќе гледаат дека главниот Јавен обвинител следи професионални критериуми, мислам дека ќе има ефект. Но, треба да има и санкции за неизвршување на својата должност, зашто обвинителите се платени од граѓаните“, изјави Демири.
„Од април 2016-та година почна нашето судење и еве трае сѐ уште, значи изминаа година и 3 месеци, а судскиот процес е на почетокот. Дури на 10 јули, пред два дена, добивме информација дека се одложува на неодредено, со тоа дополнително ќе се оддолжи решавањето на овој судски спор. Значи, нема да заврши годинава, а се отвора прашањето и дали ќе заврши следната, 2018 година. Тоа само по себе е кршење на човековите права, зашто секој, којшто е обвинет во разумен временски рок, треба да биде суден и да се докаже, дали е виновен или не. Мора да се има во вид, дека се спроведува паралелно казнување без одлука на суд. Во нашиот случај, првин бевме 50 дена во куќен притвор, потоа ни ги одзедоа пасошите, значи бевме спречени да излегуваме од државата, па потоа требаше да се пријавуваме секој втор понеделник во полиција и во суд“, вели Савески.
„Сето тоа има елементи на казнување без судска одлука, особено кога ќе се стави во контекст на континуирано одложување на судскиот спор. Но, она што ние го правиме е тоа што сакаме да биде правдината истерана до крај“, додава Савески.
Тој е сигурен дека судските процеси во кои се обвинети членовите на „Левица“, што учествувале во протестите на Шарената револуција се политички мотивирани. Како што вели, претходната власт со изрекување притвор и други санкции, без судење, имала намера да испрати порака до другите учесници во протестите, да ги исплаши, за да се повлечат пред силата на режимот, зашто во спротивно ќе ги снајде истата судбина и нив.
„Но, човек мора да се држи цврсто и да се бори за тоа, во што верува“, порачуваат Демири и Савески.
Моника Талеска
