пишува: ЏАБИР ДЕРАЛА
Во познат стил, својствен на политичката партија која се нарекува „левица“ (порано и „e majta“, на албански, но го избришаа тоа), веб страницата Антропол.мк, на 5 мај 2021 година, објави долга и отровна потерница под наслов „Двојните аршини на западните пропагандисти“, потпишан како Реџеп Исмаил (Хактан) Президиум на „Левица“. Текстот изобилува со навреди и говор на омразата, а се изнесуваат и низа груби лаги, клевети и манипулации со фактите. Омразата е нескриена. Авторот ги повторува ставовите на својот шеф и неговото пошироко партиско „семејство“ во чии јавни настапи има само груби навреди и дисквалификации, како лични, против мене, така и против организацијата во која работам, но и кон сите неистомисленици на оваа партија.
Едноставно, сите што ги поддржуваат европските вредности, но и македонските национални интереси, според функционерот на „левица“ се „западни пропагандисти“. За простачкиот речник во текстот и во секојдневните обраќања на шефот и функционерите на „левица“, за нападите ad hominem, наместо одговори на прашања, нема посебно да коментирам, бидејќи тие многу јасно говорат за нив самите, не за мене.
Споредено со интензитетот со кој антидемократската и ултранационалистичка пропаганда на „путинистите“ сложно напаѓаат, јас одговарам исклучително ретко. Секогаш се обидувам да го одржам нивото, заради сопственото достоинство и пристојност, а секако и заради јавноста.
Убеден сум дека повеќето луѓе препознаваат што е омраза, манипулација, лага, навреда и закана со убиство. А сето тоа, во огромни количини, го има кај пропагандистите кои ги наведов.
ОДГОВОР НА ОДНЕСУВАЊЕТО НА УЛТРАНАЦИОНАЛИСТИТЕ И АНТИДЕМОКРАТИТЕ ВО ПОЛИТИКАТА И НИВНИТЕ ПРОПАГАНДИСТИ
Го пишувам овој коментар, затоа што е неопходно да се алармира целокупната јавност, па и тие што можеби мислат дека овие политичари се во право кога се однесуваат вака непримерно и незаконски. Целта не им е да ги одбранат македонските интереси, туку да ги нападнат, за да ги остварат своите лични и интересите на антидемократски центри на моќта. Ова е одговор на однесувањето на ултранационалистите и антидемократите во политиката и нивните пропагандисти.
Како и во случајот со други, поголеми и постари политички партии, така и со лажните „левичари“, се работи за структури кои се финансираат од парите на граѓанките и граѓаните на Северна Македонија. Ние имаме право да побараме од нив да се однесуваат соодветно на Уставот и законите, да бидат одговорни и транспарентни, а не да дивеат и да сеат омраза, страв и несигурност меѓу луѓето. Тоа што го прават „левичарите“, откако се трансформираа во радикална десничарска партија, едноставно, не е нормално. Покрај тоа, спротивно е на Уставот и законите, спротивно е на демократските стандарди и на етиката.
Да појаснам, оваа партија, преку својот функционер, уште еднаш истура лавини од навреди и дисквалификации против мене, но и против ЦИВИЛ и многу други што во споменатиот текст се опфатени под изразот „западни пропагандисти“, што и да им значи тоа на овие екстремни десничари од „левица“.
ДИРЕКТНА СМРТНА ЗАКАНА СО ЛИНЧ
Текстот „Двојните аршини на западните пропагандисти“ не е ништо посебно. Впрочем, мојот коментар го зема само како повод, за да ги илустрира и другите неброени медиумски содржини, како и објавите на пропагандистите на социјалните мрежи. Ако ги погледнете медиумските платформи на црната пропаганда, ќе забележите дека се работи за планирана и систематски спроведена пропагандна операција. Целта е да се дискредитира и омаловажи тоа што дел од граѓанското општество го прави во одбрана на човековите права и слободи, но уште повеќе заради поддршката што ја дава во процесите за исполнување на македонските национални интереси и стратешки определби.
Би сакал тука да издвојам уште еден момент, не дека е исклучок, туку затоа што е илустрација за модел на однесување. Веднаш по објавата на текстот на неговиот сопартиец, шефот на „левица“ побрза да го поддржи на социјалните мрежи нарекувајќи го текстот „АнтиЦИВИЛ“ и го цитира делот од текстот во кој има директна смртна закана со линч:
„Полека не се сили, оти утре и Заев и САД ќе соберат парталите и ќе си заминат, а ти, навлекувајќи ја омразата која они ја создале, ќе останеш ачик среде бесни ѕверови – кои, претходно, додека биле врзани и мали, си ги малтретирал со дренова прачка“!
Со ова, „шефот“ потврдува дека овие зборови се и партиски став, ако се има предвид дека тој текст не е ниту прв, а веројатно нема да биде ниту последен, општоприфатен партиски став дека сите што не мислат како нив ќе се соочат со смртни закани.
НЕВЕШТА ЗАМЕНА НА ТЕЗИТЕ
Во својот текст, функционерот на „Левица“ (Хактан), како и неговиот шеф и други „левичари“, ги повторува поранешните ставови и манипулациите со фактите. Тој прави невешта замена на тезите, омилена „стилска вежба“ на пропагандистите од целата црна палета во македонската политика и извлекува „заклучок“ дека некој (јас, ние во ЦИВИЛ и прогресивните граѓанки и граѓани) се обидува да им го попречи правото да бидат приврзаници на Русија или други земји на Истокот.
Тоа е неточно! Се работи за заканите и малтретирањето што активистите за човекови права, интелектуалци и новинари со години го трпат токму од пропагандата на политички структури кои „се прославија“ со 11 години режим и сите нивни варијации, вклучително и теророт во Собранието на 27 април 2017 година. Позната е нивната „дил-ориентед“ политика и кокетирањето со авторитарните режими од Истокот, но и од ЕУ (Унгарија).
Критиката на практикувањето на европските вредности се во темелите на западните демократии. Не е забрането да се биде приврзаник на ниту една политичка ориентација. Не е забрането да се води политичка борба против Западот и против евроатлантските интеграции на Северна Македонија. Но не е забрането ни да се критикува таквата определба и дејствување. Нели?
Во јавноста и во политиката не е дозволено ни да навредувате, да пцуете, да лажете, да се заканувате и да го рушите поредокот со политичко насилство. Во тоа е разликата!
ЛИНЧ, СТРЕЛАЊЕ, БЕСЕЊЕ, СЕЧЕЊЕ ГЛАВИ, ОРУЖЕН БУНТ
Со кратко пребарување на партискиот орган „Антропол.мк“, ќе откриете дека ова не е ништо ново. Меѓу авторите на нападите се и Цуцуловски, Затаракоски, Захов, Ристов, но има и непотпишани текстови со дезинформации, навреди, клевети и закани. Тоа е само една веб страница. Ги има неколку десетици. За кампањите на Фејсбук и Твитер и да не говориме. Тоа е обемна и скапа, добро организирана пропагандна операција.
Партијата „левица“ (инаку произлезена од граѓански организации кои своевремено, а и сега, се финансираат од западните земји), негува краен анимозитет против граѓанското општество и редовно повикува на линч, стрелање, бесење, сечење глави, повикува на оружен бунт против институциите и одмазда против „предавниците“ и сите што мислат и дејствуваат различно од нив. Тие одамна ги напуштија позициите на граѓанските заложби за социјална правда и станаа партија на екстремната националистичка и антизападна десница во земјата.
ТОЛКУ ЛИ СЕ ПЛАШАТ ОД НАС?!
Во едно прогресивно и демократско општество, никој (најмалку јас или луѓето на ЦИВИЛ) и не помислува да се обиде да навредува, лаже и заканува некому ако се определи за Русија или за било која земја на Истокот. Напротив, тоа се значајни држави, а нашата земја треба да негува добри односи со сите земји во светот, почнувајќи од соседството па натаму.
Но дејствувањето против стратешките интереси на нашата држава, поткопувањето на темелите на демократијата и демократските институции, злоупотребата на функциите и парите на граѓан(к)ите за ширење лаги, омраза, поделби и страв се забранети. Токму тоа и го прават овие центри на моќта кои ние сосема соодветно нарекуваме и антизападни, но подеднакво релевантни би биле и називите: антидемократски, авторитарни, сомнителни, ултранационалистички, радикални, екстремно десничарски, па и антимакедонски.
Посебно загрижувачки е фактот што парламентарни политички партии влегуваат во конфликт со прогресивни граѓански ентитети и поединци и поттикнуваат омраза против нив. Тоа е чиста злоупотреба на јавните пари за да се води црна кампања против граѓанското општество.
Позната е праксата, заснована и на меѓународни или европски конвенции и легислатива, според која многу е тешко да се попречат, а уште повеќе да се санкционираат претставници на граѓанското општество и медиумите кои упатуваат остри критики и вредносни судови против политичарите, кои се често и на граница на добриот вкус.
Овде ситуацијата е обратна! Зошто, по ѓаволите?! Толку ли се плашат од нас?!
ЗЛОУПОТРЕБА НА ФУНКЦИИТЕ И ПАРИТЕ, НЕПРИСТОЈНО, НЕДОСТОИНСТВЕНО И ВУЛГАРНО
Одредени политички структури вршат отворена злоупотреба на функциите и парите на граѓанките и граѓаните. Ја искористуваат моќта на политичките партии и контролата врз дел од медиумите надвор од секакви принципи на пристојноста, крајно недостоинствено и вулгарно. Тие сосема отворено, како да е нормално, секојдневно работат против прогресивните, демократските и прозападно ориентираните групи, организации и поединци. Со наши пари удираат по нас, како што тоа систематски го правеше режимот на Груевски. Како да се тркаат кој ќе пласира поголеми и поцрни пропагандни содржини. Секој ден, со години!
Во оваа валкана кампања се вклучени и највисоки партиски функционери, бивши и сегашни политички поставени директори на државни институции од редовите на ултранационалистички партии, директори на агенции, регулаторни тела или комисии, вклучувајќи ги тука и самите шефови на ВМРО-ДПМНЕ и на Левица, едниот и професор на скопскиот универзитет, другиот доцент на УГД Штип. Тие во континуитет изнесуваат груби и вулгарни навреди, пцости, клевети, омраза и невистини против новинари, активисти и политички опоненти со години наназад. Ако се погледнат објавите на социјалните мрежи и на медиумите кои се под нивно влијание или контрола, може да се забележи дека луѓето на ЦИВИЛ им се „омилена“ мета.
Повеќе од јасна е намерата на оваа црна пропаганда насочена против една прогресивна граѓанска организација за човекови права која постои 22 години. Целта им е да се омаловажат активностите, како и извештаите и анализите на организацијата која ужива огромен углед и доверба, како од голем број граѓанки и граѓани во земјава, така и на меѓународно ниво. Уште повеќе, јасно е дека Левица е дел од структурите во земјава кои се обидуваат, не само да омаловажуваат и навредуваат, туку и да ги заплашат граѓанките и граѓаните.
(Се надевам дека целта им е само таа и дека зад пропагандата не се кријат и лични фрустрации, љубомора и комплекс на пониска вредност, белким не дотаму отидени… Или се?)
Овие структури знаат дека не можат да ме заплашат мене и моите другарки и другари. Вистинската цел на нивната гнасна пропаганда и жестока агресија се граѓанките и граѓаните, сакаат нив да ги заплашат и замолкнат. Преку нас, му се закануваат на целото општество. И прават кривични дела! Ги повикувам сите свесни и совесни граѓанки и граѓани да ги отфрлат овие вулгарни насилници јасно, гласно и недвосмислено.
Времето на насилниците помина. Насилството не поминува повеќе во македонското општество. NO PASARAN!
