Велика Британија им се придружи на 27 други земји во осудата на Израел за лишување на Палестинците од „човечко достоинство“, а тие упатија повик за итно прекинување на војната во Газа, пишува Гардијан.
Дејвид Лами, министерот за надворешни работи на Велика Британија, им се придружи на министрите од Австралија, Канада и Франција во апелот до израелската влада да ги укине ограничувањата за протокот на помош, тврдејќи дека страдањето на цивилите „достигнало нови длабочини“.
Тие, исто така, ги опишаа предлозите на израелскиот министер за одбрана, Израел Кац, за преместување на 600.000 Палестинци во таканаречен „хуманитарен град“ во Рафа, област која е тешко оштетена од израелските бомби, како „целосно неприфатливи“.
Во комитетот за врски на Долниот дом, премиерот Кир Стармер рече дека ситуацијата во Газа е „неподнослива“, повторувајќи ја посветеноста на Велика Британија да признае палестинска држава „во време кое е најповолно за перспективите за мир“ во регионот.
Во понеделник, Израел започна значителни воздушни напади и копнена операција во Газа, насочени кон Деир ал-Балах, главниот центар за хуманитарни напори на опустошената палестинска територија, поради предупредувања за проширување на гладот.
Најновиот напад започна еден ден по најголемиот број на жртви во последните 21 месец што го нанесе израелската војска врз очајните Палестинци кои бараат помош во храна, со најмалку 85 убиени во она што стана мрачен и речиси секојдневен колеж.
Агенцијата за храна на ОН, Светската програма за храна, соопшти дека поголемиот дел од убиените во неделата се собрале во близина на граничната ограда со Израел со надеж дека ќе добијат брашно од конвојот за помош на ОН кога врз нив пукале израелски тенкови и снајперисти.
„Ситуацијата на теренот во Газа е неподнослива на толку многу нивоа и тоа го ставаме на знаење во сите наши разговори со Израел и со други земји. Без разлика дали станува збор за смртта на оние што чекаат во ред за помош, без разлика дали станува збор за плановите да се принудат Палестинците да живеат во одредени области или да бидат исклучени од одредени области, сите тие се неподносливи и апсолутно погрешни во принцип.“, изјави Стармер, пренесе Гардијан.
Во соопштението објавено во понеделник, министрите за надворешни работи го повикаа Израел веднаш да ги укине ограничувањата за протокот на помош и итно да им овозможи на ОН и хуманитарните невладини организации да ја завршат својата работа. По двомесечна блокада на поголемиот дел од помошта што влегува во Газа, што ги доведе 2,1 милиони жители на територијата на работ на глад, Хуманитарната фондација за Газа, поддржана од САД и Израел, надгледуваше хаотична и честопати смртоносна операција.
„Страдањето на цивилите во Газа достигна нови длабочини“, рекоа министрите за надворешни работи. „Моделот на испорака на помош на израелската влада е опасен, ја поттикнува нестабилноста и ги лишува жителите на Газа од човечко достоинство. Го осудуваме дотурот на помош капка по капка и нехуманото убивање на цивили, вклучително и деца, кои се обидуваат да ги задоволат своите најосновни потреби за вода и храна.“, се вели меѓу другото во соопштението.
Д. Т.
