Претседателот на СДСМ, Зоран Заев во денешното обраќање од партиското седиште, пред партиското членство и македонската јавност, ја презентираше Програмата на идната влада. Говорејќи за употребата на албанскиот јазик во институциите, тој беше дециден, дека секој граѓанин нема обврска да учи албански јазик.
„Лага е дека сите ќе треба да учат некој друг јазик,а во спротивно – дека ќе бидат казнети. Казнените одредби постојат и сега, и тие се однесуваат на институции, кои што не го почитуваат Уставот и законот. Предвидуваме закон за употреба на јазиците, бидејќи сметаме дека на сите граѓани треба да им овозможиме полесно да функционираат во секојдневниот живот и во комуникацијата со институциите. Новата влада ќе предложи законски решенија за употреба на јазиците, со што ќе се прошири употребата на јазикот што го зборуваат најмалку 20 отсто од граѓаните т.е. албанскиот јазик, во рамките на аманданот 5 од Уставот. Законот ќе ја прошири употребата на јазикот во институциите и ќе овозможи на граѓаните-Албанци да комуницираат со државните институции на својот мајчин јазик “ рече Заев.
„И другите малцинства во земјата, Срби, Бошњаци, Роми, Власи, ако се 20 отсто во општината каде живеат, ќе можат да се обратат до институциите на својот мајчин јазик“, изјави Заев.
Тој потенцираше дека парламентарното мнозинство е силно посветено на зацврстување на унитарноста на Македонија, зачувување на суверенитетот и стабилноста на државата. Заев порача дека никој нема право да ги блокира демократските процеси, зад кои застанаа граѓаните.
„Нема да правиме нешто, што е противуставно. А простор за дебата, секогаш има. По консултацијата со експерти, заклучено е дека е противуставно да има двојазични банкноти или воени и полициски униформи, бидејќи тоа не е во согласност со Уставот, бидејќи денарите и униформите се употребуваат на целата територија на Република Македонија“.
Заев посочи на дел од приоритетите на парламентарното мнозинство.
Членство на Македонија во ЕУ и НАТО, спроведување на препораките од извештајот на Прибе, подобар животен стандард на граѓаните во држава за сите граѓани, одговорна влада и контрола на власта, рамномерен регионален развој, формирање на Специјално одделение во Основниот суд за предмети од СЈО…, се меѓу главните заложби на идната влада.
Во програмата на идната влада, според Заев, не се споменува, геноцидот врз албанското население, којшто беше споменат во Платформата на партиите на етничките Албанци.
За време на експозето на Заев, лидерот на ВМРО-ДПМНЕ, Никола Груевски на својот Фејсбук профил, порача:
„Кога имате стотина илјади луѓе на улиците секој ден, значи дека проблемот е сериозен и треба да се лоцира во кого е и зошто е тој револт и проблем. Единствено решение со кое би се смирил гневот на измамените граѓани е да се слушне нивниот глас. Заев и СДСМ треба да сфатат дека народот се противи на тоа што тие на преговорите ги ставија државните и националните интереси“.
