ВЕСТ НА ДЕНОТ

Кадровски промени во владата

Собранието денеска во рамки на 75. пленарна седница ги избра Мухамет Хоџа за министер за животна средина и Беким Сали за министер за евроинтеграции. Веднаш по изборот Хоџа и Сали дадоа свечени изјави пред пратениците.

Претседателот на Владата Христијан Мицкоски пред Собранието ги образложи предлозите Мухамет Хоџа да биде министер за животна средина и Беким Сали за министер за евроинтеграции.

Изборот на новите членови на Владата дојде по локалните избори одржани во октомври откако Изет Меџити стапи на градоначалничката функција во Општина Чаир, кој ги извршуваше функциите прв вицепремиер и министер за животна средина и просторно планирање.

ИЗЈАВА НА ДЕНОТ

СДСМ: Енергетската криза е последица на криминални тендери и неспособност на Владата, а не на протестите во Грција 

Кризната состојба во енергетиката не е предизвикана од протестите во Грција, туку е директен резултат на криминални тендери, лошо планирање и сериозна неспособност на Владата предводена од ВМРО-ДПМНЕ, обвини денеска Социјалдемократскиот сојуз на Македонија.

Од СДСМ посочуваат дека официјалните податоци говорат за огромни финансиски загуби во енергетскиот сектор. Само во првите два квартали од годинава, загубата изнесува 77 милиони евра, а проекциите покажуваат дека до крајот на 2025 година таа ќе надмине 100 милиони евра.

„Ова се поразителни бројки и јасен доказ за целосен распад на енергетското управување. Наместо стабилен систем, имаме хаос, загуби и криза која намерно се префрла на грбот на граѓаните“, велат од СДСМ.

РЕГИОН

Изборната комисија ги поништи предвремените избори за претседател на РС во 17 изборни единици на 136 избирачки места

Централната изборна комисија (ЦИК) на Босна и Херцеговина ги поништи предвремените избори за претседател на Република Српска во 17 изборни единици на 136 избирачки места. Ова беше одлучено на состанокот на 24 декември.

СВЕТ 

Заштитниот штит на Чoрнобил може да се сруши по руските напади, предупредува директорот на централата 

Заштитниот штит изграден над поранешната нуклеарна централа Чорнобил може да се сруши по рускиот напад претходно оваа година, изјави директорот на централата Серхиј Тараканов во интервју за АФП  објавено на 23 декември, пренесува Кијив Индипендент.

„Никој не може да гарантира дека објектот за засолниште ќе остане таму по тоа. Тоа е главната закана“, предупреди Тараканов.

Четвртиот реактор во нуклеарната централа Чорнобил доживеа топење на реакторот во април 1986 година, што доведе до затворање на локацијата.

СЛОБОДНА ЗОНА

„Изјавата на градоначалникот на Скопје – Орце Геогиевски е веројатно најлошата форма на отфрлување на сопствената одговорност за лошиот воздух во градот, пред се во доменот кој е секогаш негов! Тој изјави дека биле посетени некои загадувачи и дека истите биле казнети. И толку! Па вие верувајте ако сакате – тој си постави огради меѓу себе и јавноста на наједноставен ама и најдрзок начин.“, пишува Љубомир Костовски во клумната „Соопштението на градоначалникот на Скопје – новата магла во скопската магла “.

„На 24 декември 2025 се навршуваат 13 години од „црниот понеделник“, денот кога власта на ВМРО-ДПМНЕ, предводена од Никола Груевски, насилно ги исфрли новинарите и опозициските пратеници од Собранието за да го протурка буџетот за 2013 година без расправа и без демократски легитимитет легитимност. Година дена подоцна, годишнината ја одбележаа десетина активисти за демократија и човекови права, со банер на кој пишуваше „Борбата продолжува“. Но банерот беше подолг отколку што имаше луѓе да го држат, па помогнаа неколку новинари. Само една година подоцна!“, пишува Џабир Дерала, во колумната „Нека е честит црниот понеделник“.

Подготви: Д. Тахири