Бугарските власти, кои првично дадоа дозвола, сепак на крајот истата ја повлекоа и не дозволија прелет на авион со кој рускиот министер за надворешни работи, Сергеј Лавров, требаше да допатува на Самитот на ОбСЕ во Скопје. Причината која ја наведоа за одлуката е тоа што во авионот, како дел од делегацијата, била и портпаролката на руското МНР, Марија Захарова.
Летот, кој се одвивал преку воздушниот простор на Турција и на Грција, а не и на Бугарија, траел повеќе од пет часа, а Лавров слетал на скопскиот аеродром дури по завршувањето неформалната вечера (на која, како што дознаваме воопшто и не бил поканет), и по заминувањето на неколку делегации, меќу кои и онаа со американскиот државен секретар Ентони Блинкен.
Во нотата од бугарското Министерство за надворешни работи, според руски медиуми, стои дека дозвола за учество на горенаведената средба во Скопје е дадена за министерот за надворешни работи на Руската Федерација Сергеј Лавров и неговата придружна делегација во согласност со белешката, но:„ Дозволата не се однесува на директорот на одделот за информации и печат на руското Министерство за надворешни работи, Марија Захарова, која се појавува на списокот со санкции, во согласност со важечките закони на ЕУ“.
Поради доаѓањето на Лавров, учеството на состанокот на ОБСЕ во Скопје го откажаа украинскиот министерот за надворешни работи, Дмитро Кулеба,како и шефовите на дипломатиите на балтичките земји – Естонија, Летонија и Литванија, и министерот за надворешни работи на Полска Шимон Шинковски вел Сек.
За потсетување, како што предходно објави Цивил Медиа, кога на 1 и 2 декември 2022 година, домаќин на Министерскиот совет на ОБСЕ беше полскиот град Лоѓ, иако Лавров изрази желба да присуствува на Самитот, од Полска, како актуелниот претседавач со ОБСЕ, му беше забранет влез во земјата.
Драган Мишев
