До ден денешен Илинден претставува симбол на единството, рамноправноста, слободата и светлата перспектива, како јасни насоки на развојниот пат на државата за да се фати чекорот со напредните, европските држави, напиша министерот за внатрешни работи Оливер Спасовски во честитката по повод најголемиот државен празник – Илинден – 120 години од Крушевската Република и 79 години од Првото заседание на АСНОМ.
И годинава, како што истакна Спасовски, историскиот моментум од нас, како држава и како народ, изискува храброст и мудрост, прогресивен дух и визија, кои во аманет ни ги оставија нашите предци, преку заедништвото на Илинденците во првиот Илинден од 1903 година, со формирањето на првата Република на Балканот – Крушевската, и државничкиот став на АСНОМ-ците во 1944 година.
– Нивниот копнеж за демократска, слободна и напредна Македонија, ние денеска го живееме. Денес имаме отворена јасна европска перспектива за нашите граѓани, за која се изборивме и по која станавме меѓународно препознатливи, со заеднички демократски вредности, економски стабилна држава, почитувана, безбедна, со бројни меѓународни пријатели и партнери, посочува Спасовски.
Тој додава дека токму Илинден е тој жив потсетник за идеалите за кои се изборивме, а чии носечки двигатели се делата и подвизите на нашите предци.
Од друга страна, генерален секретар на СДСМ – Миле Зечевиќ смета дека На 120 годишнината од илинденското востание, од првиот Илинден, како македонската парадигма за слобода и непокор, за заедништво и сплотеност, дојде време да го поставиме новиот камен-темелник во македонската историја.
– Како што храбрите мажи и жени на Илинден се обединија, така и ние треба да се обединиме за европската иднината, зад европска Македонија. Тоа ќе биде почит за нашите предци, но пред се и над се ќе биде одговорност за нашите млади македонски генерации. Борбата за македонската европска иднина е борба за младиот човек, за сигурна иднина на следните наши генерации. Рамноправни во големата Унија на европски нации. Секогаш, свои на своето. Со вграден македонскиот идентитет во европскиот, со подобар животен стандард, во европска држава, истакнува Зечевиќ.
За новата македонска иднината, тој смета дека сите заедно, без разлика на вера, нација, политичка или друга определба, како на втори август ‘903-тата, треба да застанеме на страната на современиот патриотизам, за горда и достоинствена европска македонија!
