„Неправда и немир“ е збирка од колумни, претежно од авторките и авторите кои се дел од ЦИВИЛ и редакцијата ЦИВИЛ Медиа, но и блиски соработнички и соработници кои ја поддржуваат организацијата со години наназад. Во оваа книга се објавени и колумни од авторки и автори со чии ставови можеби и не се согласуваме како организација, но медиумската платформа на ЦИВИЛ е простор за изразување на сите, тоа е форум за различни мислења и дијалог во општеството.
Оваа книга е избор од колумните објавени во рубриката МИСЛА на www.civilmedia.mk. Ова е збирка на различни мисли, ставови и чувства изразени во првата година по падот на еден долгогодишен режим во кој слободата на изразувањето беше третирана како крајно непријателска и предавничка активност. Со оваа книга се обидовме да дадеме придонес кон тешката трансформација на општеството од заробено во слободно, во време кога медиумите сѐ уште се прпелкаат во полумракот и неуспешните обиди да се претстават како независни.
Собрани на едно место, голем дел од овие текстови можат да послужат како водич низ турбулентната македонска реалност, но и како елаборат за вистински реформи и демократска трансформација. Администрацијата, министерствата и разните државни агенции и јавни установи треба да се препознаат овде и да го сфатат ова четиво и како упатство и како опомена истовремено. Ништо не им вредат затворените кругови во кои тие „транспарентно“ носат одлуки за сите граѓанки и граѓани. Треба да погледнат овде, бидејќи на овие страници се наоѓаат искрени и длабоки согледувања на состојбите, настаните и процесите.
Горд сум што сум дел од екипа која никогаш не се предава и секогаш е на страната на граѓанките и граѓаните. Оваа книга е само скриншот од нашата неуморна работа. Додека оваа книга да влезе во печат, на нашата медиумска платформа ќе се објават уште најмалку десет значајни колумни, а на нашите социјални профили ќе има стотици реакции…
Слободно. Независно. Отворено. – гласи мотото на медиумската платформа што ја развиваме со години.
Ќе додадам само: работиме, говориме и пишуваме без калкулации и компромиси, без фолирање и додворување. Секогаш искрени и посветени до крај. Тоа сме ние, ЦИВИЛите!
Срдечно Ваш,
Џабир Дерала
ЦИВИЛ
