ДРАГАН МИШЕВ
Не пропуштајте ја следната епизода од теленовелата „Рачиња во мед“ во ко-продукција на ВМРО-ДПМНЕ и „независната компанија за правење филмови“ Град Скопје, во улогата на извршен продуцент се појавува неповторливата Данела Арсовска и под режисерска палка на ненадминатиот (звук на фанфари) Никола Груевски.
Драмолетката со меѓусебните препукувања на релација градоначалничка- кадри на ДПМНЕ на раководни функции во градските претпријатија навлезе во втората недела одсвоето емитување во етерот. Бранот оставки (или разрешувања, во зависност од која страна на довчерашните партнери гледате) ја бранува јавноста веќе втора недела, додека вербалните напади, прозивки и обвинувања отидоа ниво погоре, во раководните структури, односно директно во врвот, инволвирајќи ги градоначалничката (независна, а поддржана и до скоро и обожувана како најдобра менаџерка, најдобра градоначалничка и уште многу друго „нај“ од ВМРО ДПМНЕ), и лидерот на истата таа ВМРО-ДПМНЕ, шпицниот градоначалник („wanna be“ премиер) Христијан Мицкоски.
Каде (и зошто) пукна тиквата помеѓу доскорешните сојузници. Речиси до вчера, еден со друг си делеа комплименти, глорифицирајќи ја улогата која ја имаат во тековните општествено-политички збиднувања. Таа беше нивната „челична дама“, тој беше „вистинскиот човек“ кој работи за доброто на градот, земјата, народот… И одеднаш, катаклизма. Цунами…
Но, како Данела го одбра токму овој момент да прогледа за “рачињата во мед“ на ВМРО-вските директори, за вработувањата на партиските војници во „нејзините“ претпријатија, сите оние аномалии за кој градоначалничката досега изигруваше „француска собарица“. И, дали таа самата дојде до овие сознанија, или некој и „помогна“ тоа да госфати. Кој ја „разбуди заспаната убавица“ од комотниот „коалициски“ сон?
Во јавноста се вртат неколку сценарија на оваа трагикомедија. Од она најбаналното, со која ВМРО-ДПМНЕ се обидува да ја префрла топката на СДСМ, со обвинение дека Данела игра по диктат на владејачката партија со цел да се спаси од некои обвинувања кои стојат во нечија фиока, преку тоа дека обработува за човекот кој ја инсталира во Сојузот на стопански комори… Но, за едно, некако тивко, или воопшто не се зборува, дека всушност „преобразбата“ на Данела е нарачка од „пастирот“ од Будимпешта. Па не за џабе градоначалничката, уште како претседателката на Сојузот на стопански комори на Македонија, стана почесен конзул на Унгарија во нашата земја. Дојде време инвестицијата да се наплати.
Гревовите со кои Мицкоски си ги поткопа позициите кај бегалецот во Будимпешта јасно и гласно ги кажа Данела од говорницата во градското собрание (со неизбежното заканувачко клатење со глава, налактена со двете раце на говорницата). Покрај поголемиот број дисквалификации кои му ги упати на актуелниот* претседател на ВМРО-ДПМНЕ, градоначалничката му ги упати следните зборови: „Да се бореше со власта, да се бореше против спорните договори, како што се бори овие три/четири дена со мене, ќе ја спасеше Македонија“… како излезено од Фејсбук статусите на „никогаш непрежалениот бегалец“.
Пастирот, очигледно, му замерува на својот пулен, кој го „октроиса“ во негов заменик на лидерската позиција во ВМРО-ДПМНЕ, дека не успеал да се спротивстави на власта и попуштил во борбата за блокирање на евро-атлантските процеси на државата.
Нелогичните потези што ги презема Мицкоски, вклучително и начинот на кој беше донесена одлуката за референдум, како и неразбирливата, двосмислена формулација на референдумското прашање, кои изгледаат како да се подготвени така намерно, за иницијативата, ако не биде отфрлена, секако ќе биде осудена на неуспех. Може за него и да имаат некаква логика, да се ставени во функција со цел да се испазари за својот опстанок на политичката сцена, како со домашниот, но уште повеќе со странскиот фактор.
Дали Груевски, кој и самиот беше во слична, ако не и иста позиција, ги препозна сигналите за отклонување на Мицкоски од матрицата која тој самиот му ја зацрта, пи сфати дека овој се подготвува да ја пресече папочната врвца со која е поврзан со својот наредбодавец од Будимпешта. Клонот решил да се отклони.
И на сето ова, Мицкоски реагира неочекувано млако во своја одбрана, релативизира, како да не сака да се спротивстави, барем не јавно, на својот ментор. Му станало јасно на човекот од каде дува ветерот.
*Зборот „актуелниот“ е употребен во контекст на временската рамка во која читателите ќе го имаат пред себе овој текст, каде лесно може да се случи, во време кога ќе го читаат текстот, актуелниот веќе да биде поранешен.
