Според најновите информации од теренот, што ги соопшти Министерот за одбрана на Украина Олексиј Резников, руската армија во моментов на копно има распоредено 112.000 војници во непосредна близина на украинската граница. Заедно со поморската и воената воздухопловна компонента, руските сили во близина на украинските граници бројат околу 130.000 војници.
„На почетокот на декември набљудувавме 41 баталјонско-тактичка група и други единици на руската армија, кои броеја 94.000 војници. Со авијациската и поморската компонента тие броеја околу 110 илјади. Сега ги следиме единиците кои бројат околу 112 илјади војници, а со поморската и авијациската компонента нивниот број се зголеми на околу 130 илјади луѓе“ – изјави министерот Резников за јавноста (28 јануари 2022).
Според министерот за одбрана, во април минатата година, борбената компонента, која ја распореди Русија, изнесуваше 126 илјади луѓе. Тој исто така информираше дека Русија распореди 300 тенкови повеќе отколку минатата година.
„Количината на модерно противтенковско оружје што го има нашата војска денес е значително поголема од бројот на потенцијални цели“ – додаде министерот.
Како што информира министерот Резников, Украина во овој период добива огромна воена помош од САД и другите земји членки и созјузнички на НАТО ја испорачуваат во овој период.
„Веќе ја примаме воената помош во вредност од 200 милиони долари во воздухопловството. Веќе пристигна помошта за анти-тенковска борба од шведско производство од Британија. Ја очекуваме и помошта од земјите во балтичкиот регион, а примаме и финансиска помош од владата на Канада, Данска и други. Не можам да откријам детали за вооружувањето што го добиваме, но верувајте, оваа помош значително ги подобрува нашите одбранбени способности“ – изјави украинскиот министер за одбрана, Олексиј Резников.
Во интервју за ЦивилМедиа, амбасадорката на Украина, Наталија Задорожњук, објавено на 13 јануари 2022, направи паралела на одбранбените способности на нејзината земја:
„Украина е во состојба на војна веќе осма година. Ние за ова бевме целосно неподготвени во 2014 година. Првичниот план на Русија беше да ја подели Украина на половина, да ги окупира источните и јужните региони на Украина, создавајќи псевдодржавен ентитет „Новорусија“. Но, дури и тогаш, кога на руските трупи им се спротивставија набрзина собрани одделни единици на украинската армија и доброволци, сè што Русија успеа да заземе во источна Украина беше релативно мала територија, а имено – дел од административната територија на Доњецката и Луганската област. […] Кремљ знае дека станавме значително посилни. Колку и да не им се допаѓа тоа на Русите, нашата борбена моќ расте, нашиот борбен потенцијал се зголемува. Вооружените сили на Украина се доопремуваат.“
И во анализата „Вести од Источниот фронт“ (ЦивилМедиа, 28 јануари 2022), се изнесува податокот дека само американската помош на Украина од критичната 2014 година до сега, изнесува 5,4 милијарди долари, наменети како за мирнодопски развој, така и за одбраната на земјата. Најновиот пакет воена помош, како што изјави и украинскиот министер за одбрана, Резников, изнесува 200 милиони долари.
Џ. Д.
