ЏАБИР ДЕРАЛА
Длабоко ме трогна пораката на украинскиот претседател до светот. Човек не може да остане рамнодушен на глетката на лидерот на една суверена и независна земја како стои среде урнатините и им се обраќа на лидерите во светот, повикувајќи ги да дојдат на средба на која ќе се говори за мир.
Ако сакаме слобода и мир, имаме човечка и цивилизациска обврска да застанеме во одбрана на мирот и слободата на Украина. Не се работи само за една земја. Бруталната војна што ја води Русија против Украина е војна и против целиот свет – војна на лагите против вистината, тиранијата против достоинството и слободата, смртта и уништувањето против животот и прогресот. Тоа е војна против човековите права и слободи!
Затоа е важна оваа порака од лидерот на Украина. Трае само шест минути, но ќе остане впишана во историјата како моќен повик до светот да се разбуди и да ја одбрани слободата.
Претседателот Зеленски стои среде разурнатата печатница „Фактор-Друк“ каде што се наоѓа печатарската продукција на украинската издавачка куќа „Виват“. Се работи за најголемиот печатарски објект во Украина. Една третина од сите книги печатени во Украина се печатени таму. Заедно со објектот изгореле околу 50.000 книги, меѓу кои се и насловите отпечатени за најголемиот фестивал на книгата во Украина што треба да се одржи овие денови.
Да, Украина живее, наспроти теророт што го спроведува Русија против Украина повеќе од десет години, а спроведува целосна инвазија повеќе од две години.
Зеленски прави паралела со познатото дело од Реј Бредбери – „Фаренхајт 451“, велејќи дека температурата на огнот во печатницата не успеала да достигне 451 степен Фаренхајт. Но, вели големиот лидер, тоа е она што им треба и го сакаат лидерите на Русија – уште повисоки температури.
Бруталната војна што ја води Русија против Украина е војна и против целиот свет – војна на лагите против вистината, тиранијата против достоинството и слободата, смртта и уништувањето против животот и прогресот. Тоа е војна против човековите права и слободи!
Русија стои зад бројни кризи и воени конфликти во светот. Мрачната клика во Кремљ успеа да развие способност сѐ да претвори во оружје. Ја окупира најголемата нуклеарна централа во Европа, заканувајќи се со нуклеарна катастрофа. Гладот, како и пред деведесет години, го вооружи против Украина, но и против целиот свет. Разорува и срамнува со земја цели градови и села во кои не може да се живее повеќе. Го негира постоењето на украинската нација, ги дехуманизира Украинците, им ги киднапира децата и ги русифицира.
Русија не сака дијалог. Мрачната, крвожедна клика што ја води оваа држава се потпира на две работи: подли лаги и крваво насилство. Ништо друго. Затоа, овој интелектуалец и уметник кој ја поведе својата земја во храбра борба за слобода, го потсетува светот дека прекин на огнот со Русија не е возможен, туку само траен и праведен мир. Историјата покажа дека Кремљ секое ветување и гаранција за мирно решавање на конфликтите ги злоупотреби само за купување време и заземање подобри позиции – за напад и уништување.
Нема ниту едно оправдување за никого во светот да не ги прифати овие факти и да не даде свој придонес кон мирот за Украина. Бидејќи мирот за Украина не е само за една нација – тоа е мир за целиот свет!
Преведено од оригиналот, објавен на CIVIL.TODAY
