Невладината организација „Мировна акција“ од Прилеп и Тетово објави повик за пријави за „Тренинг за изградба на мир“ што ќе се одржи од 15-ти до 25-ти март 2017 година, во хотелот „Монтана” во Крушево.
„Ова е седми по ред основен тренинг во организација на ‘Мировна акција’. Го организираме 16 години по 2001-та година. Година ипол, по настаните од мај 2015-та година во Куманово, и во услови на долготрајна криза која има свои политички, социјални, но и етнички димензии“, соопштуваат од „Мировна акција“.
Сите кои имаат потреба и мотивација да делуваат во своите средини и да работат на изградба на мирот во Република Македонија, без разлика на нивната професионална определба, може да аплицираат за учество на тренингот, до 5 март 2017 година, на е-мејл: [email protected].
Оттаму велат дека се работи за базична програма на мировно образование која трае од 2010 година, наменета за лица од целата држава кои имаат интерес да работат врз себе, и да ја препознаат и зајакнат својата улога во општеството, а особено, во процесите на изградба на мир.
Тренингот за изградба на мир нуди:
- Развивање на сензибилност за различните форми на насилство и дискриминација
- Развивање на сензибилност за механизмите и динамиката на настанувањето на конфликти
- Отворање на прашањата поврзани со соочување со минатото, личните искуства, доминантните наративи и размисли како понатаму
- Културна размена меѓу лица од „конфликтните подрачја“ и запознавање на „другиот/та“
- Промисла за личната улога во општествената промена, инспирација и можни идеи за тоа како може да се делува во нашето општество
Темите кои се обработуваат на тренингот се насилство, разбирање на конфликти, соочување со минатото, изградба на мир, ненасилна акција, родни улоги, идентитет и национален идентитет, дискриминација и друго.
Програмата на тренингот е отворена и флексибилна, направена да ги следи потребите, можностите и мотивацијата на учесниците/чките, така што одредени теми може и да не бидат обработени, за сметка на други кои може да се покажат како повеќе потребни.
Тренери ќе бидат Фланза Јусуфи („Мировна Акција“, Тетово), Горан Талевска и Боро Китаноски („Мировна Акција“, Прилеп) и Албулена Карага (Кичево/Скопје).
