По наредба на ЈО, во рамките на истрагата за трагичниот пожар во Кочани, полицијата денес ги привела поранешните министри за економија Ваљон Сарачини и Беким Незири, кадри на ДУИ, како и актуелниот министер без ресор и поранешен директор на Дирекцијата за заштита и спасување (ДЗС), Шабан Салиу,Меѓу уапсените е и актуелниот директор на ДЗС, Џеват Селами, кадар на ВЛЕН.
Меѓу осомничените, наводно е и Дритон Кучи, поранешен министер за економија, кој во моментов ја извршува функцијата амбасадор на Македонија во Норвешка.
Според Телма, полицијата со наредба за приведување била во неговиот дом за време на акцијата, но тој бил во амбасадата во Осло.
Откако бил известен за акцијата, Кучи на својот фејсбук профил објави дека со првиот лет ќе се врати Скопје.
Уапсен бил и актуелниот директор на ДЗС Џеват Селами, но како и за претходните имиња, така и за него Обвинителството вели дека официјални информации ќе има во текот на денот.
Од досегашмите 30 осомничени, истрагата на обвинителството е проширена уште за најмалку 23 лица. Јавното обвинителство и МВР соопштија дека во тек е приведување на повеќе лица, но не соопштија детали, најавувајќи го тоа за подоцна во денот. Според истрагата, осомничени се министрите за економија од 2012, како и раководителите во ДЗС, но не и раководството на Државниот пазарен инспекторат (ДПИ), како ни актуелниот министер за економија Бесар Дурмиши.
