Уште еден руски дипломат е прогласен за персона нон грата и е протеран од земјава, потврди министерот за надворешни работи, Бујар Османи.
– Бидејќи информациите од тој тип се обично од доверлив карактер, не можам да влегувам во детали, меѓутоа МНР секогаш кога ќе добие потврдени и документирани информации за однесување на акредитирани странски дипломати коешто е спротивно на принципите на Виенската конвенција презема мерки за заштита на својата национална безбедност, меѓутоа и безбедноста на сојузниците во сојузот во којшто припаѓаме. Така да, информацијата е точна, изјави Османи.
Дел од медиумите објавија дека станува збор за заменик военото аташе во амбасадата, кој направил несоодветни дипломатски дејства со тоа што не ги почитувал дипломатските правила во Македонија.
Во мај годинава МНР веќе прогласи еден дипломат на Амбасадата на Руската Федерација за непожелна личност во Република Северна Македонија. Русија тогаш реагираше со преземање реципрочни мерки, односно со протерување на еден вработен во нашата Амбасада во Москва.
