Стотици сограѓан(к)и изразија поддршка за малата Ембла Адеми од Гостивар, откако вчера во јавноста и медиумите одекна информацијата дека родителите на учениците од едно одделение од гостиварското основно учлилиште „Башкими“ одлучиле да не ги пуштаат децата на настава поради тоа што во училницата учи и 11-годишната Ембла, дете со Даунов синдром.
Министерот за образование и наука, Јетон Шаќири, утрово на Фејсбук соопшти дека на негово задоволство и на задоволство на нејзиното семејство, Ембла продолжува да стекнува нови знаења, да напредува и да ги развива пријателствата со своите врсници.
Шаќири напиша дека Ембла не ја почувствува радоста од повторното враќање во училишните клупи на првиот ден од второто полугодие, затоа што, за жал, како што вели, „во нашето општество се уште постојат стереотипни размислувања и предрасуди за луѓето со посебни потреби“.
„Среќата во очите на Ембла е наша заедничка среќа. Победа на општеството и на вистинските човечки вредности. Посакувам вакви ситуации да не се повторуваат. Затоа, мораме да продолжиме да даваме придонес кон подигнувањето на свеста за децата со попреченост. Тие не се поразлични од другите и заслужуваат еднаков пристап до квалитетно образование како и сите други. Тоа е основно право и должни сме да го овозможиме, да создадеме услови во кои секое дете ќе го развива и ќе го реализира својот полн потенцијал. Да докажеме дека подигнувањето на инклузивноста на образовниот систем е наш врвен приоритет и процес кој ќе продолжиме да го спроведуваме. Драга Ембла, ти посакувам успех во понатамошната едукација. Застанувам позади тебе во секоја следна битка!“, напиша Шаќири на својот фејсбук-профил.
Народниот правобранител, по објавата за случајот со ученичката со Даунов синдром од Гостивар, формира предмет по сопствена иницијатива и испрати тим во училиштето за да го испита случајот. Според Народниот правобранител, недозволиво е овие ученици да бидат жртва на непоготвеноста на поединци да ги прифатат различностите и на истите да им биде отежнат пристапот до образовниот процес, кој со Устав и со закон им е гарантиран на сите подеднакво, без елементи на каква било дискриминација.
Впрочем, како што се наведува во соопштението, изминатите години сите чинители во општеството кои се занимаваат со оваа проблематика, вклучувајки ја и институцијата Народен правобранител дадоа голем придонес во реформите во образовниот просцес, токму во делот кој се однесува на инклузивноста на учениците, затоа што различноста не смее да биде сфатена како казна, како што тоа е направено во конкретниот случај.
„Народниот правобранител ги охрабрува родителите за вакви случаи да не молчат, туку да се обратат до институциите, со цел навремена заштита на правата на нивните деца гарантирани со законите. Исто така, смета дека е добро што медиумите покажуваат сензибилност и ги објавуваат сториите, но укажува на фактот дека при објавувањето на овие стории мора максимално да се води сметка за заштита на најдобриот интерес на детето и да се избегнуваат експлицитни кадри или фотографии од децата“, се вели во соопштението.
Градоначалникот на општина Гостивар, Арбен Таравари најави дека проблемите со отпорот на некои родители ќе бидат надминати. Таравари по средбата со таткото на Ембла и раководството на училиштето потврди дека таа ќе се врати во училницата за четврто одделение. Ваквата одлука дојде по средбата на градоначалникот на Гостивар, Таравари, директорот на училиштето Зиадин Нуредини, таткото на Ембла, персоналниот асистент и дефектолог во просторијата во која девојчето добива поддршка од стручно лице.
Д.М.
