Од Специјалното јавно обвинителство ниту потврдуваат ниту демантираат дека истражители и обвинители преземаат предистражни дејствија во издавачката куќа „Медиа Принт Македонија“. „Се преземаат различни дејствија во различни предмети на СЈО. Но, во интерес на истрагите, како и тајноста на предистражната постапка, не можеме да коментираме во овој момент“, велат од СЈО.
Одговор не добивме ниту од менаџметот на МПМ. Во обидот да дојдеме до вистината за дејствијата на СЈО и за стратегијата на издавачката куќа МПМ во однос на иднината на медиумите и работниот ангажман на тимовите коишто со години, ги подготвуваат дневните весници „Дневник“, „Утрински весник“ и „Вест“, бевме упатени, прашањата да ги испратиме на мејл. Но, серверот на МПМ е исклучен.
Во МПМ неодамна е извршена промена во сопственичката структура на капиталот. „Орка Холдинг“, управуван од Јордан Камчев и компанијата „Интернет Инвестмент Груп“ во сопственост на Јана Станисављева, излегоа од сопственичката структура на „Графички центар ДОО“, долгогодишен сопственик на МПМ. Сопственици на МПМ сега се „Мирекс Плус“ и „Телеграф“, во сопственост на Срѓан Керим.
Освен трите дневни весници, МПМ е сопственик и на „Македонски спорт“, порталот „Телеграф“ и магазинот „Теа Модерна“.
Неисплатените плати на вработените во трите дневни весници, се причина тие денеска да стапат во штрајк на неопределено време, со поддршка на Самостојниот синдикат на новинари.
