Со министерката за труд и социјални политики разговаравме за стратегиите, политиките и практиките што ги спроведува МТСП во контекст на унапредувањето и промовирањето на меѓуетнички и верски односи и промоција на мултикултурализмот во нашето општество.
Во интервју за ЦИВИЛ Медиа, министерката Јована Тренчевска се осврна на новиот закон за родова еднаквост кој е насочен кон еднаквите можности, законската рамка со која ќе се заштитат основните човекови права, од дискриминација и еднаквиот третман на сите граѓани, без разлика на етничката или каква било припадност.
„За да може да зборуваме за родова еднаквост, најнапред треба да знаеме што е родова еднаквост, и што овозможува. Често се поставува прашањето – зошто родова, а не полова еднаквост?, кога зборуваме за полова еднаквост, во старт имаме различни позиции, жена и маж. Не може да бараме мажите да станат жени, а жените да станат мажи, и да бараме еднаквост. Затоа велиме дека политиките треба да бидат насочени не кон полова, туку кон родова еднаквост. Кон она што општеството го наметнува како однесување, како атрибут, за девојчињата, момчињата, она што како родова улога ти го наметнува општеството, што е подобно за жените, а што е подобно за мажите. Родовата еднаквост значи овозможување еднакви права на жените и мажите, еднакви можности за жените и мажите, и еднаков пристап до сите ресурси во општеството, и еднаков бенефит од тие ресурси“, посочи Тренчевска во однос на законот за родова еднаквост.
Во однос на инклузијата на Ромите, Тренчевска вели дека со воведувањето на „Декадата на Ромите“ во 2005 година, надлежностите за инклузија на Ромите е кај Министерството за труд и социјални политики, со обезбедување широка палета на социјални права и детска заштита.
„Во 2022 година владата ја донесе новата стратегија за инклузија на Ромите, со временска рамка до 2030 година, каде не само МТСП, туку и голем дел од другите министерства имаат свои обврски да постапат за да можеме заеднички да работиме на инклузијата на Ромите. Самата стратегија се однесува на шест области на дејствување, здравство, образование, детска заштита, вработување, социјална и здравствена заштита, една од важните работи е домувањето. Тоа се области со активности во кои треба да се вклучат повеќе институции, за да можеме навистина да кажеме дека од една страна им го подобруваме квалитетот на животот на припадниците на ромската етничка заедница, и од друга страна, дека работиме и на инклузија. Особено на инклузија во процесот на образование и инклузија во предучилишното образование“, вели меѓу другото министерката Тренчевска.
Разговорот го водеше Дијана Тахири
Камера: Александар Ризински
Фотографија: Биљана Јордановска
Монтажа: Ариан Мехмети
