Индустријата на лажните вести во нашата земја е комплексна и широко распространета. Една од основните цели на оваа индустрија е да се разниша довербата на луѓето во институциите и да влее несигурност, страв и паника. Големи се штетите предизвикани од дејствувањето на центрите што продуцираат и дистрибуираат лажни вести.
Дел од лажните вести се продуцираат со цел да се предизвикаат негативни ефекти врз нашата економија, преку манипулирање со информации за стабилноста на македонската национална валута или за други теми и области од економијата, финансиите и животниот стандард. Овој прилог се занимава со лажните вести за стабилноста на денарот.
На веб страницата „Лидер“ вчера се појави текст со наслов „Зошто паѓа денарот?“ Веќе во самиот наслов се насетува манипулација. Не се ни поставува дилемата дали денарот е стабилен, туку се оди директно на прашањето зошто тој паѓа. Самиот прилог е повеќе од очигледно манипулативен и се користи со непроверени онјајн алатки, со графикони што самите по себе не значат ништо.
На овие графикони им се „лепи“ ставот дека „на социјалните мрежи отвори сомнеж дека денарот девалвира и ја губи цената“ што, исто така, е произволно, па и бесмислено тврдење. Кои социјални мрежи, врз основа на кои параметри или примери се извлекува тој став? Манипулацијата брзо се открива веќе во самиот текст.
Текстот понатаму продолжува со една фантастична „аргументација“ која самиот уредник си ја извлекува од сопствениот пост на социјалните мрежи во кои толку измешал сѐ што некој би помислил дека авторот, всушност, се подбива самиот со себе. Така авторот и уредникот на веб страницата се цитира самиот себе си во својот текст, па вели:
Ова не е девалвација и промена на курсот на денарот, туку е краткорочна supply/demand реакција на forex. Во превод, ова не значи дека вредноста на денарот паѓа, туку дека народот нема доверба во нашата валута, влада и економија и во кризни времиња ги менува заштедените денари во други валути па има повеќе денари во оптек, напиша Љупчо Златев главниот уредник на ,,Економски Лидер”.
И оваа бесмислица се објавува со цел да се дојде до главната порака со која овој и сличните медиуми во континуитет го напаѓаат медиумскиот простор: „народот нема доверба во нашата валута, влада и економија“.
И сега, врз основа на тотални бесмислици, публиката, ако е наивна, треба да му поверува на авторот кој самиот себе си се цитира, користејќи манипулации и алатки кои веројатно ни самиот не ги разбира, без оглед на тоа колку се тие релевантни или не. Впрочем, фактите за овој текст не се важни. Важно е да се пласира пропагандната порака дека „народот нема доверба во нашата валута, влада и економија“.
Да потсетиме, Лидер е една од веб страниците за кои неодамна пишуваше словенечкиот истражувачки тим на Нецензурирано, според кој четири македонски медиуми (ТВ Алфа и веб страниците Курир, Нетпрес и Лидер) примиле 2,5 милиони евра црни пари од Будимпешта за ширење пропаганда против македонските евроатлантски интеграции во 2018 година.
Како противтежа на пропагандата со лажни вести и дезинформации, Народна банка на РСМ објави соопштение со кое ја информира јавноста дека девизниот курс на денарот е стабилен и дека располага со низа инструменти со коишто гарантира дека девизниот курс на денарот во однос на еврото ќе остане стабилен.
Воедно, НБРСМ сподели и податок дека девизните резерви коишто се клучни за одржување на стабилноста на курсот на домашната валута се на високо ниво, и тоа двојно повисоко од пред глобалната економска криза во 2008 година – информира НБРМ. Во соопштението на НБРСМ се апелира да не се користат непроверени онлајн алатки кои не ја отсликуваат реалноста.
За дел од медиумите не се важни фактите, ниту пак колку лошо изгледаат бесмислиците што ги објавуваат, туку пропагандата. Овој текст е илустрација за тоа.
