Бугарија и Србија објавија дека од 7 јануари остануваат без испораката на гас од Азербејџан. Во четвртокот бугарската државна гасна компанија Булгаргаз објави дека на 6 јануари добиле известување за прекин на испораката на гас од Азербејџан, а снабдувањето се очекува да биде обновено на 11 јануари.
Прекинот дојде откако азербејџанската филијала на БП во петокот објави дека ја прекинала работата на платформата Шах Дениз Алфа (СДА) откако открила технички проблем со подводниот гасовод за извоз на гасен кондензат, пренесува Н1.
Булгаргаз изјави дека заменскиот гас е набавен во Турција.
Српскиот претседател Александар Вучиќ денеска изјави дека добил известување од Азербејџан дека во наредниот период, поради проблеми што ги имаат, нема да можат да испорачуваат 1,7 милиони кубни метри гас во Србија секој ден.
Вучиќ рече дека Србија од недела ќе почне да ги користи резервите на гас и додаде дека се надева дека испораката на гас ќе биде обновена во рок од месец до два Србија, која троши повеќе од 3 милијарди кубни метри гас годишно, потпиша договор со Азербејџан да купува 400 милиони кубни метри природен гас годишно почнувајќи од 2024 година.
Остатокот од гасот за Србија доаѓа од Русија, додека Бугарија престана да добива руски гас во април 2022 година, откако го отфрли барањето на Русија да го плати гасот во рубљи.
Канцеларијата за контрола на странски средства на Министерство за финансии на САД вчера попладне соопшти дека ја додала Нафтената индустрија на Србија –НИС на списокот со санкции насочени против компанијата „Гаспромњефт“ и Руската Федерација бидејќи компанијата е во мнозинска сопственост на Русија, а рокот за промена на сопственичката структура е 45 дена.
Драган Мишев
