Целта на одбележувањето на Светскиот ден на слободата на медиумите е да се промовира принципот на слобода на медиумите, да се истакне важноста на заштитата на медиумските слободи и борбата против сите форми на влијание врз медиумите, како и да се потсетиме на медиумските работници кои ги загубија животите при вршење на својата работа.
Во текот на изминатите 13 години, ЦИВИЛ работеше на креирање медиумска платформа која е слободна, независна и отворена. Организацијата се реши на овој потфат во услови на медиумски мрак, кога режимот ги претвораше новинар(к)ите во држачи за микрофони, а медиумите во своја пропагандистичка и националистичка огласна табла.
ЦИВИЛ непрекинато продолжува да биде отворен и независен простор за споделување мисли и ставови од новинари, автори и активисти од различни профили.
По повод Светскиот ден на слободата на медиумите, ЦИВИЛ – Центар за слобода покани експерти и професионални новинарки и новинари да дадат своја изјава или да напишат краток текст. Во текот на денот се објавија повеќе текстови, изјави и интервјуа, специјално подготвени за медиумската платформа на ЦИВИЛ.
Зоран Иванов , Хетерогени состојби – хетерогени медиуми – хетерогени вистини, Марина Тунева, Ниту еден политички субјект или центар на моќ не смее да го (зло)употребува новинарскиот труд, Војо Маневски – Слободата и новинарите, Жарко Трајановски – Слободата е најголема жртва на воената и пропагандна агресија, Петрит Сарачини – 3 Мај: Кој ја нарушува слободата на медиумите?, Бранко Тричковски – Нема што да се честита, Борјан Јовановски – Патот до вистинска слобода на медиумите е многу долг, Љубомир Костовски – Расправата за медиумите кај нас се води во редуциран простор. Ненад Јовановиќ – Слобода од угнетувачи, националисти и шарлатани, Маја Анчевска –За каква слобода на медиуми зборуваме кога новинарите не уживаат никаква заштита, Џабир Дерала во едиторијалот Медиумите се современата Голгота каде што се распнуваат фактите, Ерол Шаќири – Неодговорни медиуми, политичари и медиумски неписмена нација, Дејан Србиновски – Неказнивоста за нападите и заканите врз новинарите мора да престане, Љубиша Николовски – Медиумите ја губат битката со себе, Александар Србиновски – На нашето општество и на медиумите им се потребни коренити и суштински промени.
Д. Т.
