Високиот комесар на ОН за човекови права Волкер Туерк денеска изрази жалење за „значителното зголемување на омразата“ во светот по нападите на Хамас на 7 октомври. Туерк во изјавата рече дека жали за зголемениот број случаи на антисемитизам, исламофобија и други форми на говор на омраза, соопшти ОН.
„Последиците од оваа криза (…) можат да се видат насекаде, тие ги дехуманизираат и Палестинците и Евреите. Сведоци сме на значително ширење на говор на омраза, насилство и дискриминација, како и продлабочување на социјалните фрактури, поларизација и негирање на правото на слобода на говор и мирно собирање. Слушнав дека Евреите и муслиманите велат дека не се безбедни и тоа ме растажува“, истакна претставникот на ОН.
Израелската армија го опколи градот Газа, обидувајќи се да го уништи Хамас и да одговори на нападите на 7 октомври, во кои, според израелските власти, загинаа околу 1.400 луѓе во Израел, главно цивили. Министерството за здравство во Газа, под контрола на Хамас, тврди дека повеќе од 9.400 жители на Газа, главно жени и деца, загинале во израелската офанзива.
Туерк додаде дека во светот има сè повеќе примери на „малтретирање, напади и говор на омраза против муслиманите и Евреите, вклучително и на митинзи поврзани со конфликтот“. Високиот комесар, исто така, ја осуди „тензичната и токсична реторика на омраза“ што ја користат политичките лидери.
„Поплавата од изјави со омраза на кои сме сведоци, вклучително и на социјалните мрежи, е одвратна“, рече тој.
„Меѓународното право е јасно во овој поглед. Забрането е секое повикување на етничка, расна или верска омраза што ќе поттикне дискриминација, непријателство и насилство“, посочи тој.
Туерк воедно нагласи дека е загрижен за ограничувањата на слободата на говорот во време на конфликт, истакнувајќи дека некои земји во голема мера го ограничиле правото на протест, наведувајќи ја опасноста за националната безбедност и глорификацијата на тероризмот.
„Државите мора да гарантираат безбеден и соодветен простор за учество и дискусија. Тие не можат неразумно да го ограничат учеството, дискусијата и критичките коментари за конфликтот, ниту изразувањето на солидарност со Израелците и Палестинците. Во некои случаи, воспоставивме општи и непропорционални ограничувања на собири, особено кога станува збор за пропалестинските собири“, додаде тој.
Г. Т.
