НБРМ соопшти дека девизниот курс на денарот е стабилен. Воедно, НБРМ апелира на совесно и одговорно информирање и проверка на вистинитоста на изворите на информации. Според соопштението на НБРМ, секое произволно толкување на информациите во врска со домашната валута може да креира негативни ефекти за нашата економија. Ова соопштение доаѓа по зачестените објави во некои медиуми, каде што се изнесуваат неточни информации и шпекулации во кои се тврди обратното.
Девизните резерви коишто се клучни за одржување на стабилноста на курсот на домашната валута се на високо ниво, и тоа двојно повисоко од пред глобалната економска криза во 2008 година – информира НБРМ.
Во својот апел, НБРМ ги има предвид објавите во некои медиуми и на социјалните мрежи каде што се коментираат девизни курсеви на онлајн-платформи. Од НБРМ укажуваат дека овие онлајн-платформи не се релевантен извор за следење на вредноста на денарот и дека тие пресметки не произлегуваат од реалното тргување со валути.
„Единствен релевантен извор на информации според којшто населението и фирмите може да го следат девизниот курс на домашната валута е курсната листа што ние како централна банка ја објавуваме на нашата веб страница www.nbrm.mk. Таа ги отсликува цените на валутите од реалните тргувања на домашниот девизен пазар. На курсната листа којашто е во важност и во моментов, средниот курс на еврото во денари изнесува 61,69 денари“ – соопштува НБРМ.
Понатаму, НБРМ апелира онлајн-платформите да не се користат како релевантен извор на информации и нивното прикажување на виртуелни пресметковни курсеви да не се смета за релевантен податок, бидејќи не ја прикажуваат вредноста по која странските валути се купуваат на домашниот пазар, односно кај банките и менувачниците.
Граѓаните треба да бидат спокојни. Стабилноста на курсот била, е и ќе остане наш приоритет. Ние гарантираме дека денарот е и ќе остане стабилен!
НБРМ истакнува дека располага со низа инструменти со коишто гарантира дека девизниот курс на денарот во однос на еврото ќе остане стабилен.
