пишува: САФИТ ЗЕЌИРИ
Да се искористи приликата да се прошетаат градовите на Република Северна Македонија, и да се пренесе која е разликата, не е лесно. Во населените места на источниот дел од државата, во кои се забележува разлика од пред неколку години, повеќето се празни и нема многу движење на младите, а веројатно и повеќе се почитуваат мерките за спречување на коронавирусот.
Во еден кус разговор со еден угостител во Делчево, на прашањето каде се луѓето, ми одговори дека многумина се по европските земји, и дека само за време на летниот период се враќаат дома. Во Берово не забележав движење, а во Кочани, бидејќи беше пазарен ден, беше поинаку. Виница ништо посебно, исто така делуваше празно, а пак во Кратово освен неколку дечиња и стари лица, не видов движење на младина. Пробиштип ми остави впечаток на чист град, среден центар и убаво вкусно кафе каде што можев да забележам малку повеќе движење за разлика од гореспоменатите градови. Штип неколкупати сум поминал и забележено е дека има движење и студенти од други градови и земји, и како што велат и самите, барем има кој да се прошета по штипските улици. Интересно беше во Свети Николе, како што кажаа и самите граѓани, како за среќа, забележав малку повеќе движење, но не е како што било пред неколку години. Гевгелија така празна, во Струмица имаше нешто повеќе, дури и мала гужва по улиците додека излегов од градот со автомобил. Во Кавадарци времето се погоди да дува ветер, може тоа беше и причина да не се забележи движење на кавадарчани, а Неготино празнично делуваше, можеби излезени на излет.
Каде е младината, зар сите отидоа надвор од земјава, или можеби во Скопје?
За разлика од источна Македонија, западниот дел има разлика. Од Тетово до Гостивар ( речиси споени со селата),во овие два града често се губи време на семафорите, па дури и по кружните текови треба да намалиш брзина заради колоните возила пред тебе. Кафулињата и во ова време на пандемија, секако, со почитување на протоколите за Ковид-19, средно полни, но има голема разлика, се забележува поголемо движење и на млади и на повозрасни. Кичево – добар град, за кратко ќе стигнеш на излезот, но тука е добро за една кратка пауза за кафе, сепак ќе видиш повеќе народ отколку во другите источни градови. “Како Струга нема друга”, сите го велиме истото, не е многу сменето, но можеби затоа што беше ден пред викенд па некој поранил и дошол да го помине викендот и да го искористи убавото време покрај Дрим. Ресен како за четврток, беше добар ден, мало гратче, ми заличи исто како источниот дел, празен, но сепак се забележуваше младина. Охрид сите знаеме дека не е ист како во летниот период, но се зачудив, пред пандемијата и тоа декември месец за разлика од сега почетокот на пролетта и со сончево време, малку се разочарав не забележав прошетки. Добро, веројатно почитуваат мерки… ако не се заминати.
По овие глетки низ речиси целата држава, неизбежно ми е прашањето – каде е младината, и дали ќе направиме нешто за тие да останат во својата земја?
