„Aлбанските политички партии во Македонија можат да ги соберат потписите од пратениците кои ги верификуваа мандатите и да го известат СДСМ, дека е создадено парламентарното мнозинство со минимум 61 пратеник. Потоа, ќе го известат претседателот Ѓорге Иванов дека има парламентарно мнозинство. Тогаш претседателот е должен да го даде мандатот на оваа коалиција“, изјави за ЦИВИЛ Медиа, професорот д-р Осман Кадриу, посочувајќи на оваа уставна можност, со која би се превенирале евентуални опструкции во однос на постапката за формирање влада.
Професорот д-р Кадриу е дециден дека по враќање на мандатот од Никола Груевски, претседателот на државата Иванов, веднаш треба мандатот да го предаде на партијата со најголем број пратенички мандати по ВМРО-ДПМНЕ. Поточно на СДСМ, која што има 49 мандати, или само два помалку од партијата на која првично ѝ беше доделен мандатот. Но, ако тоа Иванов не го направи, тогаш, со еден потег на партиите на етничките Албанци, може да се превенираат какви било пречки.
„Ако и во ваква ситуација, претседателот Иванов не го предаде мандатот на формираното парламентарно мнозинство, има решение. Тоа парламентарно мнозинство ќе бара да се свика седница на Собранието, со која треба да претседава највозрасниот пратеник, доколку сегашниот претседавач Трајко Велјаноски не го направи тоа“, вели професор д-р Кадриу.
На следното продолжение на собраниската седница, вели професорот д-р Кадриу, ќе бидат две точки, избор на Кадровска комисија и избор на претседател на Собранието. Па, на истата или на наредната седница, со постигнато парламентарно мнозинство ќе се избира влада.
„Ова е уставниот пат до избор на нова влада. Во моментов, нема никакви кочници за тоа. Доколку претседателот Иванов не постапи согласно со Уставот, тогаш тој може да биде повикан на политичка одговорност“, оценува професор д-р Кадриу.
М. Талеска
