Тројца кандидати за градоначалници и седум носители на листи, освен на Левица го потпишаа Кодексот за фер избори на средбата која ја организира Општинската изборна комисија Гостивар. Тројцата кандидати во обраќањата ја истакнаа важноста од водење на кампања без навреди и лични дискредитации и очекувањата да се почитуваат етичките норми во изборниот процес кој следи.
Претседателот на ОИК Гостивар, Газменд Јашари искажа задоволство од прифаќањето на поканата и тоа го оцени како важен чекор кон спроведувањето на фер избори. Неговата заменичка Ајше Османи посочи дека Кодексот за фер и демократски избори, не е само формалност, туку обврска за почитување на законите, правилата и етичките норми во изборниот процес.
Кодексот го потпишаа тројца кандидати за градоначалник на општина Гостивар: Висар Адеми (независен), Ваљбон Лимани (НАИ) и Себаедин Даути (ВЛЕН-ВРЕДИ). Кандидатот за градоначалник Дарко Грујоски и носителот на листа на листа од партијата Левица не присуствуваа на церемонијата. Грујоски во обраќањето преку социјалните мрежи, наведе дека изборите од старт не биле фер.
– Единствено на Левица ѝ е забрането платено политичко рекламирање, со што уште пред почетокот се нарушува рамноправноста и создаваат нефер услови. Не може да зборуваме за фер избори кога за сите партии важат едни правила, а за Левица сосема други – селективни и дискриминациски, наведе Грујоски.
Во Кодексот се наведува дека учесниците во изборите се обврзуваат дека ќе ги почитуваат сите закони, правила и прописи без да вршат притисок врз вработените во државните институции и установи и дека нема да користат говор на омраза.
На претстојните избори со листи за кандидати во општинскиот совет кој од овој цуклус ќе има 23 членови поднесоа: Коалиција за локални избори 2025 година предводена од СДСМ, Коалицијата „Твоја Македонија“ предводена од ВМРО-ДПМНЕ, Коалицијата ВЛЕН / ВРЕДИ, Национална алијанса за интеграции (ДУИ, АА и други партнери), партиите: Движење ЗНАМ – За наша Македонија, Левица, Движење за национално единство на Турците (ДНЕТ) Демократска партија на Турците на Македонија (ДПТМ).
