Градоначалникот на Општина Велес, Аце Коцевски, беше еден од говорниците на семинарот на ЦИВИЛ „Транспарентност и одговорност во полтичките процеси“. Коцевски пред своите сограѓани зборуваше за партерството и соработката на локалната самоуправа со граѓанскиот сектор и зедничкиот придонес кон подобри услови за живеење на сите жители во општината. Градоначалникот во првиот дел од своето излагање се фокусираше тоа партерство да го презентира преку транспарентните и одговорни политики на локлано ниво, чиј двигател е самиот.
„Вистинска демократија во општеството не може да има доколку нема развиен граѓански сектор. Сметам дека тоа е одраз на степенот на развој и политичката зрелост на едно општество. Граѓанскиот сектор е мост меѓу граѓаните и институциите, тој треба да изврши силен притисок врз донесувањето и спроведувањето на прописите. Во ова време кога имаме силна деградација на системот на вредности во општеството мислам дека е многу важно како ќе се однесуваат граѓанските организации во интерес на граѓаните за да добиеме општество во кое нема да зависи кој од која партија е, туку да добиеме општество засновано на вредности“, истакна Коцески потенцирајќи дека во минатото кога бил градоначалник општината била репер за тоа како треба да се соработува со граѓанските организации.
„Велес беше пример за општина, но тоа време помина, не можеме да живееме на тие ловорики, туку треба да ги следиме најновите трендови… За жал, времињата малку се изменија, Велес е во некоја чудна состојба, заедно со Скопје и Куманово беше еден од најразвиените индустриски градови во Македонија, но денес стана препознатлив по многу лоши работи. Стана неформална светска престолнина на лажните вести, пред тоа бевме познати по загадувањето. Колапсот на големите стопански фирми го направи своето, тоа се одразува и на буџетот на општината … Останаа само владиката и повардарската епархија. Тоа што сум им го рекол на граѓаните во изборната кампања ќе остане мој приоритет – Велес да биде општина со нула корупција. Ја наследив општината со долгови од скоро три милиони и решив да вратам голем дел од тоа, а тоа скапо ме чини. Работиме чесно, принципиелно и одговорно и да дадеме максимум од возможното“, изјави Коцевски.
Во однос на транспарентноста и отчетноста пред граѓанките и граѓаните Коцески истакна дека секоја година се прави извештај за работа на општината, буџетити, информациите од работата на Советот, со цел што поголем број на граѓанки и граѓани да дознаат и да се инволвираат во работата на локалната самоуправа.
„Соработката со граѓанските организации беше на високо ниво, ние бевме пример како тоа треба да се прави. Тогаш направивме многу и со реконструкцијата на една барака која ја нарековме Дом на невладини организации. Откако ја добивме битката со Топилницата добивме спласнување на активноста на граѓанските организации. Сега времињата се сменија, како се прилагодуваме ние ќе треба и вие да се прилагодувате. Се отвораат можности за аплицирање за проекти од ЕУ, се бараат квалитетни проекти, затоа ќе мора да инвестира во човечки ресурси, во мрежување, во квалитетна подготовка на проектите“,рече Коцевски.
„Ние имаме една парадоксална ситуација, имаме толкав број невработени, а имаме сериозен недостиг од квалификувана работна сила. Ние во општината го чувствуваме недостигот од квалитетни кадри. Сериозно ни се трансформира општеството, а имам чувство дека ние не сме спремни да се прилагодиме. Ние во моментов немаме градежен инспектор, а дивоградби никнуваат на секој чекор. За мене е многу важна соработката, партнерството со граѓанските организации затоа што од тоа може да произлезе подобрување на квалитетот за граѓаните и демократизација на процесите“, објасни Коцевски давајќи една поширока слика за состојбата на Велес.
Биљана Јордановска
во соработка со Игор К. Илиевски
камера: Дехран Муратов
монтажа и фотографија: Биљана Јордановска
Семинарот „Граѓански објектив: Транспарентност и одговорност во политичките процеси“ е дел од истоимениот проект, финансиран од National Endowment for Democracy.
ЦИВИЛ во наредните денови ќе ги објави и последниот дел од излагањето Билјана Ивановска, како и излагањето на градоначалникот на Општина Велес, Аце Коцевски.
Повеќе информации за семинарот „Транспарентност и одговорност во полтичките процеси“:
Семинар на ЦИВИЛ за транспарентноста, одговорноста и разочарувањата
Бранимир Јовановиќ за (не)одговорноста во спроведувањето на владините реформи (1 дел)
Јовановиќ: Каде згреши оваа власт? (2 дел)
Бранимир Јовановиќ за можните излези од политичката криза (3 дел)
Ивановска, ДКСК, за транспарентноста и одговорноста во борбата против корупцијата (1 дел)
Ивановска: Привилегиите се политичка корупција! (3)
Преземање на содржините e ЗАБРАНЕТО (!!!), освен со писмена дозвола од ЦИВИЛ и тоа исклучиво според Условите за користење, авторски права и заштита на приватноста. Повредата на авторските права е забранета со закон. Врз основа на договор за соработка, оваа содржина е достапна за Плусинфо и Слободен печат без ограничувања.
