ДРАГАН МИШЕВ
Канадско-американскиот бизнисмен со македонско потекло, Крис Павловски, со кого Мицкоски ја оствари првата средба при слетувањето во Вашингтон, каде отиде за да ја следи инаугурацијата на Трамп на голем екран во спортска сала оддалечен само 2 километри од местото на настанот, и со кого разговарале за потенцијално инвестирање од неговата компанија во Македонија, воодушевен од нашиот премиер, веднаш ги оствари најавите на Мицкоски. Отвори подружница на неговата технолошка компанија Рамбл во Македонија.
Павловски, кого Мицкоски го претстави како човек близок до актуелниот претседател на Соединетите Американски Држави, Доналд Трамп, и кој ќе ги отвори вратите за пробив на земјава кај инвеститорите во САД, самиот на социјалните мрежи често споделува фотографии на кои е во друштво со Трамп, неговото семејство, со Елон Маск,
Крис Павловски , кој во интервку за македонски медиум негираше дека тој ја органзиирал и ја платил посетата на македонската делегација во Вашингонт за инаугурацијата на Трамп, не ја криеше воодушевеноста од Мицкоски. Тој истакна дека неговите родители имале потекло од Македонија, татко му од Преспа, мајка му од Мариово, и иако тој самиот не го знае јазикот на неговите родители, како секој вистински патриот отаде барата, решил да го бара гробот на Александар Големиот Македонски.
Неговиот капиталот од Форбс е проценет на 1.2 милијарди долари, а во видео-платформата Рамбл, чиј сопственик е тој, како дел од акционерската структура фигурираат и Хауард Лутник, министерот за економија на САД и ЏД Венс потпретседателот на САД,
Иако постои од 2013 година, Рамбл со популарност се здоби во последниве години, промовирајќи се како виртуелен простор имун на кансел културата и на цензура, а самиот тој на прес-конференцијата во Белата Куќа се пожали дека Рамбл бил жртва на цензура од повеќе странски влади.
Дали со отворањето на подружница во Северна Македонија, Павловски добил ветување дека оваа влада нема да му се меша во работењето, и ќе може непречено да ги пласира содржините кои на други места би биле цензурирани и забранети за емитување. Звучи идеално за субверзивни активности, ширење лажни вести, дезинформации и пласирање црна и деструктивна пропаганда. Како створена за мрежата на медиумите во сенка на Кремљ и остварување на нивната нова стратегија за влијание врз умовите на Европејците.
Според наодите на Службата за надворешно разузнавање на Украина, на почетокот на 2025 година, Русија ја реформатираше својата информациска стратегија со воведување нови организациски структури и проекти базирани на постојните: телевизиската мрежа „Русија денес“ (РТ) и новинската агенција „Спутник“, центарот за компетенции „Дијалог“ во областа на онлајн комуникациите, повеќејазичната платформа „меѓународни репортери“, традиционалните државни гласноговорници на Кремљ и армијата во сенка на интернет тролови, „независни“ експерти и странски агенти на влијание.
Суштината на промените е во тоа што Русија ги реанимира овие медиумски центри и врз нив формира псевдонезависни платформи преку кои ја шири својата пропаганда.
Најважната улога во ова ја игра „РТ“. По воведувањето на забраните од страна на ЕУ, Велика Британија и САД, официјално и кај нас, „Русија денес“ почна да создава нови медиумски проекти во Европа, главно на Интернет и на социјалните медиуми. Во исто време, започна голем број проекти на Глобалниот Југ користејќи традиционални медиуми.
На пример, во 2025 година, Кремљ издвои 31,1 милијарди рубљи за одржување на управувачката структура на „RT“. Приоритет е создавање „партиски“ проекти и нивна дистрибуција во странство. Клучна карактеристика е што ваквите медиуми не се етикетирани со брендот „RT“ и не го откриваат својот извор, користејќи вештачка интелигенција, социјални мрежи и гласници. Тие работат главно на Интернет, на платформи каде што е можно руско присуство: Телеграм, Јутјуб (преку нови сметки), платформи како rumble, како и Твитер (сега X) на Илон Маск, кој пак е блокиран во РФ.
Според пишувањето на Центарот за ресурси за бизнис и човекови права, уште во септември минатата година, во федералното обвинение поднесено од Окружниот суд на САД за Јужниот округ на Њујорк се тврди дека „Рамбл“ добил речиси 10 милиони долари од вработените во „Раша тудеј“, медиумска компанија поддржана од руската држава. Дополнително, државниот обвинител Мерик Гарланд тврдеше дека „Рамбл“ бил вклучен во шема насочена кон создавање и дистрибуција на руска пропаганда до украинската публика.
Преглед спроведен од „Медија матерс“ откри дека „Рамбл“ промовирал видеа од „Тенет медија“, десничарска медиумска операција наводно финансирана од руската влада, во делот „Избор на уредникот“, кој „Рамбл“ го опишува како „апсолутно најдобар“.
Центарот за ресурси за бизнис и човекови права го покани „Рамбл“ да одговори, но компанијата не го стори тоа.
Претходно, во март 2022 година, Ројтерс објави дека руската државна новинска мрежа RТ ќе започне со емитување на Рамбл, видео-страница слична на YouTube, откако технолошките компании, вклучувајќи ги Meta Platforms (FB.O) и Twitter (TWTR.N), го ограничија пристапот до RT по руската инвазија на Украина.
Технолошките компании во последниве денови презедоа мерки за ограничување на руските државно контролирани медиуми, вклучувајќи ги RT и Sputnik, како одговор на барањата од владите и повиците за спречување на ширењето на руската пропаганда. Русија ги нарече своите акции во Украина „специјална операција“.
Rumble е видео-страница популарна меѓу американските политички конзервативци. Во декември 2021 година, медиумскиот потфат на сегашниот, а тогаш поранеш американски претседател Доналд Трамп, Trump Media and Technology Group, објавија дека Рамбл ќе испорачува видео и стриминг за Truth Social.
Со купувањето на Твитер ( сегашен Х) од страна на Маск, како да се заокружува светото тројство Рамбл – Truth social- X преку кое ќе делува руската пропагандна машинерија во западните демократски општества, плодовите од ваквата соработка ги гледаме денес.
А дали некој во Северна Македонија пред да ја претстави големата технолошка инвестиција Рамбл го провери нејзиниот политички бекграунд? И ако да, кој реши истиот да го прогласи за подобен сопатник во скршнувањето од евро-интеграцискиот пат?
Во меѓувреме, коњушарите на петтиот јавач на апокалипсата-ДЕЗИНФОРМАЦИЈАТА, на цел глас ќе ве убедуваат: Нема руско влијание во Македонија!?
