Претседателот на Украина, Володимир Зеленски за време на разговорот со новинарите на аеродромот Стенстед при завршувањето на неговата посета на Велика Британија, изјави дека нема шанси за територијални отстапки од украинската страна, нагласувајќи дека Украинците никогаш нема да ги признаат привремено окупираните територии како руски, пренесува Укринформ повикувајќи се на Sky News.
Зеленски истакна дека во прашањето за териториите „треба да тргнеме од разбирањето на меѓународното право“. Според него, „Ние не сакаме ништо што не ни припаѓа, но кога нешто окупирате или кога ќе го прекршите законот, сè ќе ви се врати“.
Тој нагласи дека Украина никогаш нема да ги признае окупираните територии како руски: „За нас ова ќе биде привремена окупација“.
Во исто време, претседателот истакна дека е „подготвен да потпише“ украинско-американски договор за развој на минерали дури и по последната средба со Доналд Трамп во Белата куќа, која заврши предвреме.
Коментирајќи ги несогласувањата што се појавија за време на разговорите во Овалната соба, Володимир Зеленски нагласи дека тој едноставно сака „да се чуе украинската позиција“, а партнерите „да се сетат кој е агресорот во оваа војна“.
Во врска со договорот за завршување на војната, претседателот на Украина нагласи дека тој треба да биде „искрен“, „праведен“ и „стабилен“ и дека безбедносните гаранции треба да бидат „многу конкретни“. Во тој поглед, тој изрази надеж дека таквите гаранции би требало да ја оневозможат секоја друга агресија на Русија. Меѓутоа, ако дојде до ова, Москва треба да почувствува „силен одговор“ од Украина и нејзините партнери.
Во исто време, рече тој, има уште „долг пат“ до крајот на војната со Русија.
Зеленски, исто така, ги нарече Соединетите држави „важен“ партнер, нагласувајќи дека Украина соработува со САД, кои продолжуваат да испраќаат помош во форма на оружје одобрено од Конгресот на САД. Тој изрази благодарност до американскиот народ за поддршката, додавајќи дека се надева дека ќе дојде нова помош од САД.
Зеленски објасни дека производството на одбрана во Украина, како и во Европа, е зголемено, но украинската страна „смета“ и на помошта на САД.
На прашањето како поминала средбата со кралот Чарлс, претседателот на Украина нагласи дека имал „многу добра“ средба со неговото височество и дека кралското семејство ја поддржува Украина.
Д. Мишев
