Министерството за труд и социјална политика со соопштение ги демантираше шпекулациите во дел од медиумите и на социјалните мрежи, според кои МТСП ја промовира идејата за зголемување на капацитетите за прифат на поголем број на мигранти во Македонија
Во ссопштението се вели дека „водејќи се од принципот на транспарентност во своето работење, Министерството за труд и социјална политика, вчера ја постави на својата веб-страница новата Нацрт-Стратегија за интеграција на бегалци и странци 2017-2027 година, со цел да се добијат сугестии од заинтересираните организации и граѓани. Овој консултативен процес ќе се заокружи со работна конференција, на која ќе се дискутира за позитивните предлози во насока на унапредување на документот“.
Во текот на 2015, МТСП донесе работна верзија на новата Стратегија за интеграција на бегалци и странци, но подоцнежните случувања околу бранот на бегалци и мигранти биле причина за пролонгирање на периодот на носење на новиот документ.Но, токму таквите настани, како и глобалните политики кон бегалската популација биле причина за дополнување на првичната работна верзија на новата Стратегија.
МТСП го осудува „тенденциозното ширење страв во јавноста од бегалците, од причина што документите како новата Стратегија за интеграција на бегалци и странци, се само еден патоказ без никакви обврзувачки акти кон кое било министерство или институција!“
Инаку, Република Македонија се декларирала како држава за транзит за мигрантите и ги ратификувала и Протоколот од 1963 и Конвенцијата за правата на бегалци од 1994 година. Во Македонија, во 2003 година е донесен Законот за азил и привремена заштита со кој се дефинираат правата и обврските на лицата кои побаруваат меѓународна заштита, четири години подоцна се направени измени на Законот за социјална заштита, а со Законот за здравствено осигурување од 2010 се прецизирани правата на лицата со признат статус на бегалец или лица под супсидијарна заштита. Меѓуресорска група од преставници од министерствата за внатрешни работи, за здравство, за локална самоуправа и Црвениот крст, во текот на 2009 изготви Стратегија за интеграција на бегалци и странци 2009-2015, како стратешки документ со клучни приоритети како пристап до права од социјална заштита, пристап до образование и пристап до пазар на труд, домување и локална интеграција, кои, според МТСП, во периодот 2009-2017 се главно реализирани.
