ЏАБИР ДЕРАЛА
Линк до СЦЕНАРИО 1/8 | Линк до СЦЕНАРИО 2/8 | Линк до СЦЕНАРИО 3/8 | Линк до СЦЕНАРИО 4/8 | Линк до СЦЕНАРИО 5/8
Сценаријата за уривање на проевропската власт во Северна Македонија се обистинуваат. Политичките лидери на партии што не се на власт или се во владејачката коалиција, сѐ поинтензивно ги уценуваат своите поголеми партнери за да дојдат до повеќе власт и пари. Не се воздржуваат од тоа да влезат во најразлични дилови само за да ги остварат своите цели, макар и по цена да ја урнат постојната владејачка гарнитура.
Медиумската војна се разгорува.
ПОЛИТИЧКИ, МЕДИУМСКИ И БИЗНИС РЕКЕТАРИ
Антидемократските (режимски) инсталации никогаш не заминаа од националниот јавен сервис МРТВ, а инсталирани се и во голем дел од регулаторните и саморегулаторните тела на медиумите. Така, радикализираната и гладна за власт опозиција пред себе има бришан простор. Ним сесрдно им помагаат „разочараните“ и разни други политички, медиумски и бизнис рекетари од безбедна „неутрална“ дистанца или „од внатре“.
Неколку интернет портали упорно ја држат линијата на одбраната на европските вредности, но тоа е битка меѓу Давид и Голијат, со големи шанси Давид да изгуби.
Главните приватни телевизии, кои неколку години богато ги финансираа и странските донатори во земјата, сѐ повеќе го напуштаат и онака лажниот баланс и сѐ поотворено ѝ даваат предност на националистичката, антизападна опозиција на своите програми. Тие сѐ поотворено навиваат и за враќање на бегалецот од правдата, првиот човек на режимот 2006-2016, Никола Груевски.
НЕВЛАДИНИТЕ ФОЛИРАНТИ СЕ ПРИДРУЖУВААТ КОН ОПЕРАЦИЈАТА
Лажно проевропските граѓански организации, по неуспехот на протестите против европската преговарачка рамка (т.н. Француски предлог), на почетокот на годината се притаени и собираат пари од меѓународните донатори. Но веќе кон крајот на пролетта се придружуваат на „операцијата“ за симнување на проевропската влада, во улога на „независни, неутрални и објективни“ експерти.
КАУЗА
Регионалните тензии, како и руската воена агресија, и покрај тоа што Русија сѐ поочигледно ја губи војната, им одат од рака на антидемократските политички, медиумски, НВО и бизнис кругови. Тие релативно лесно успеваат да мобилизираат поголем број граѓанки и граѓани во својата „кауза“ за „одбрана на идентитетот“. Таа „кауза“ сѐ поотворено е на истата линија со лажните повици за мир (читај: поддршката на Путиновата геноцидна војна).
Кризните состојби се продлабочуваат, а коалицијата на власт е дополнително разнишана поради внатрепартиски и меѓупартиски борби.
ПОЛИТИЧКИ ФРАНКЕШТАЈН
Во обид да ја спасат проевропската влада, разните европски мисии успеваат да ги убедат лутите политички ривали да седнат на преговарачка маса за да најдат заеднички јазик околу ЕУ агендата. Така, по мачни преговори, најчесто зад затворени врати, се формира широка „проевропска“ коалиција.
Во тој политички коалиција влегуваат ВМРО-ДПМНЕ и неколку други помали партии, со Наќе Чулев на чело на МВР и Драган Ковачки како министер за одбрана.
Но тогаш почнува да се наѕира колку, всушност, ЕУ со своите најдобри намери успева само да ги влоши состојбите. Од политички лекар, испадна дека е политички Франкештајн.
Целата структура почнува да се распаѓа веќе на крајот од првиот работен ден по формирањето на коалицијата. На секои 2-3 часа избиваат скандали, а функционерите на десничарите во широката коалиција, не само што ја забораваат ЕУ агендата, туку се однесуваат како да се на власт, ама апсолутна.
ТЕРОРИЗАМ И ОДДАЛЕЧУВАЊЕ ОД ЕВРОПСКАТА ИДНИНА
Станува сѐ поочигледно дека предвремени избори се неизбежни. Но тоа истовремено води и кон продлабочување на политичката и економската криза. На портите сѐ посилно чука длабока безбедносна криза.
Како што се продлабочува политичката криза, сѐ почести се вооружени инциденти во кои меѓусебно се пресметуваат одделни радикални групи, како по политичка, така и по етничка основа.
Проруските центри на моќта на Балканот и руската шпионска мрежа во земјата им пружаат огромна поддршка на радикалите, што води кон целосна дестабилизација. Земјата ја потресуваат и неколку терористички напади во кои има и човечки жртви.
Во таква атмосфера, започнуваат подготовки на предвремените парламентарни избори со кои започнува политички процес во кој земјата сѐ повеќе се оддалечува од својата европска иднина.
