Два ипол месеца по предвремените парламентарни избори од 11 декември 2016-та, Македонија е далеку од најавите дека ќе формира нова, стабилна, коалициона влада. Ниту претседателот Ѓорге Иванов има намера да ѝ го даде мандатот на втората партија по ВМРО-ДПМНЕ (51) со најголем број пратенички мандати, ниту пак СДСМ (49 мандати) може со сигурност да каже дека е на добар пат да формира влада со партиите од албанскиот блок. Платформата што постизборно ја усвоија партиите на етничките Албанци, ДУИ (10), Беса (5) и Алијанса за Албанците (3) којашто не беше дел од Договорот во Пржино и анексот на овој договор, ниту од барањата на Шарената револуција, е доведена до ниво – „conditio sine qua non”.
Додека од ДУИ велат дека не отстапуваат од својот Предлог-закон за употребата на албанскиот јазик, доставен како одговор на понудата од социјалдемократите, акцентирајќи дека законот не е почетна позиција, туку услов без којшто не се може и во рамки на Уставот, лидерот на Движењето за реформи во ДПА, Зијадин Села, како претставник на Алијансата на Албанците, најави промена на Уставот и формирање на посебно тело, коешто ќе го крои предлог-законот за употребата на албанскиот јазик. Беса најави седница на Претседателството синоќа, на која требаше да донесе одлука за последните изјави на ДУИ и на Алијансата по нивната вчерашна средба.
Од партиите на етничките Албанци се децидни дека на СДСМ ќе му ги дадат потребните потписи за да го добие мандатот. Но, акцентираат, дека тоа не е гаранција дека потписите значат поддршка за формирање влада.
Oд СДСМ сé уште нема официјални информации за текот на преговорите. Дел од медиумите објавија дека барањата за јазикот на ДУИ се неприфатливи за СДСМ, зашто, се работело „за предлози кои според оценките на СДСМ, не се од реална потреба и од корист за албанските граѓани во Македонија и кои можат да направат само штета во функционирање на одредени институции во Македонија“. Лидерот Зоран Заев рече дека се преговара за барања во рамките на Уставот. Од СДСМ се загрижени дека пролонгирањето на преговорите е поради трошење на мандатот на Специјалното јавно обвинителство, којшто истекува во првата половина на годинава.
Штрајкот на вработените во МПМ е одраз на состојбата во медиумите
Штрајкот на неопределно време на вработените во дневните весници на Медиа Принт Македонија, всушност, е реален приказ за состојбата во медиумската сфера во Македонија. Новинарите и другите вработени кои со години се грижат за техничката изработка, дизајн, за маркетинг-стратегијата на весниците „Утрински весник“, „Дневник“ и „Вест“, си ги бараат неисплатените две плати. Одговор од менаџерите немаат, затоа со поддршка на Самостојниот синдикат на новинари на Македонија, донесоа одлука за ваков чекор. Во меѓувреме, МПМ ја промени и сопственичката структура, но вработените ниту за овие новини, немаат никакви информации. А Специјалното јавно обвинителство „влезе“ финансиски да ја контролира МПМ.
Медиумската сфера е поделена и натаму, но на агендата се дебатни емисии во кои се анализираат флоскулите од поединци-репрезенти на јавниот живот, со префикс „војна“ и со фалоспевите на ВМРО-ДПМНЕ и на лидерот Никола Груевски, како синоними за македонштината, од една страна, и од друга страна, работата на СДСМ и на лидерот Зоран Заев во контекст на преговорите на релација СДСМ-ДУИ.
Јавното мислење кое се креира е далеку од основните новинарски принципи и начела за објективност, вистинитост, точност и балансираност во процесот на информирање.
Меѓународната заедница во очекување на нова македонска влада
Американскиот амбасадор, Џес Бејли изминатава недела во изјава за една македонска телевизија, рече дека 61 пратеник ќе одлучат кои партии ќе ја формираат новата влада. Но, порача дека таа треба да ја има реформската агенда за приоритет и да не се предизвика нова криза. Која било опција да се избере „сите треба да работат кон приближување на земјата до ЕУ и НАТО“, смета американскиот амбасадор, кој побара продолжување на мандатот на СЈО, но не ја коментираше Платформата на етничките Албанци.
Евроамбасадорот Самуел Жбогар изјави дека е оптимист, декаполитичките лидери во Македонија ќе го изнајдат вистинскиот начин да формираат влада, за да може ЕУ да продолжи да работи на реализирање на реформите, коишто се потребни во земјата.
Граѓанките и граѓаните во безизлез
На маргините од политичка криза, во реалниот живот, граѓанките и граѓаните не можат да ги остварат своите основни човекови права. Дишат загаден воздух, здравството се распаѓа – не работат лифтовите во некои болници, се забораваат плаценти по породување…, пратеници се напаѓаат физички во кафеани, расте бројот на физички пресметки на отворен простор, во трговски центри, расте бројот на сообраќајни несреќи, железничкиот сообраќај е во прекин, штрајкуваат исклучени домаќинства од топлификација кои мора да плаќаат сметки… Не се почитува законот, а експертите тврдат дека сé додека не владее правото, нема јавен интерес и нема волја за дебата, државата ќе тоне во криминал и корупција.
Моника Талеска
