Во Собранието денеска продолжи расправата за Предлогот за пристапување кон уставни измени за имплементирање на Договорот од Преспа, меѓу Македонија и Грција, предложен од Владата.
Ова е трет ден од расправата за предлогот, и според информациите од Собранието гласањето ќе се случи во петок.
Помошник државниот секретар на САД за Европа и Евроазија, Вес Мичел испрати јасен и сериозен сигнал дека веќе нема простор за поигрување со судбината на Македонија. Мичел, без заобиколувања и без дипломатски ракавици, му напиша на Мицкоски дека САД се разочарани од водството на оваа партија од односот кон референдумот и кон чекорите во Собранието за уставните измени.
„Како што веќе разговаравме, Соединетите Држави силно веруваат дека Преспанскиот договорот меѓу Македонија и Грција е историска можност за Македонија да обезбеди посветла иднина и да придонесе кон регионалната безбедност, стабилност и просперитет. Наспроти тврдењата дека можело да се постигне некаков „подобар договор”, ние не веруваме во такво нешто. Овој договор бараше компромис и од двете страни. Тоа е прилика што веројатно нема да се повтори со години, ако не и со децении“ – пишува Мичел во писмото до Мицкоски.
Претседателот на ВМРО-ДПМНЕ, Христијан Мицкоски денеска му одговори на вчерашното писмо на помошникот државен секретар на САД, Вес Мичел, дека Договорот од Преспа е неприфатлив за ВМРО-ДПМНЕ.
Пратениците на ВМРО-ДПМНЕ се откажаа од дебатата во Собрание и ги повикаа колегите на гласање.
Владеачката партија пак истакна дека доколку Христијан Мицкоски продолжи да ја блокира иднината на Македонија, во следните неколку денови парламентарното мнозинство ќе распише предвремени парламентарни избори.
„Граѓаните ќе ја донесат одлуката, со огромно мнозинство ќе победи опцијата за иднината, Македонија ќе биде дел од НАТО и ЕУ“, се вели во реакцијата на СДСМ.
ЗНМ и ССНМ бараат од одговорниот уредник Атанас Кировски на ТВ Телма да ја повлече наредбата за забрана на изразување мислења и ставови на социјалните мрежи на новинарите вработени во редакцијата објавена на огласната табла на медиумот. Според нив содржината и тонот на наредбата се особено навредливи и понижувачки, не само за новинарите во ТВ Телма, туку и за имиџот на самата куќа и нејзиното раководство.
„Однесувањето на новинарите на социјалните мрежи не може и не смее да се ограничува, исто како што не може и не смее да има разлика меѓу нивниот професионален и приватен систем на вредности. Но, тоа не е прашање на наредби и санкции, туку прашање на фундаменталниот интегритет на новинарот и прашање на внатрешен дијалог и доверба во редакцијата која пак, својот интегритет го црпи токму од новинарите и нејзините уредници“, се вели во соопштението.
„Сакам во името на ЗНМ најостро да ја осудам практиката на забранување на било какви коментари на новинарите на ТВ Телма од директорот и главниот уредник Атанас Кировски. Убедени сме дека ваква општа , арбитрарна и селективна забрана на било какви коментари на новинарите на социјалните мрежи за наводно зачувување на неутралноста на телевизијата претставува кршење на слободата на говорот што во Македонија е загарантирана со Уставот, а и со меѓународните документи“, изјави претседателот на ЗНМ, Насер Селмани.
Основното јавно обвинителство Скопје поднесе Обвинителен предлог против едно лице за сторено кривично дело – Загрозување на сигурноста од чл.144 ст.4 од Кривичниот законик, односно за закана кон новинар преку социјална мрежа. Обвинителниот предлог се однесува на актерот и член на Управниот одбор на ВМРО ДПМНЕ, Тони Михајловски.
Грчкиот министер за надворешни работи, Никос Коѕијас, денеска поднесе оставка по вчерашната средба на кабинетот, каде тој жестоко се судри со министерот за одбрана Панос Каменос, во врска со Договорот од Преспа, пишува Катимерини.
Според изворите на Катимерини, Коѕијас е незадоволен од тоа што за време на вчерашната средба премиерот Алексис Ципрас воопшто не се обидел да го поддржи и да се спротистави на нападите од Каменос.
А. П.
