ДРАГАН МИШЕВ
Воопшто не се обидувајте да одговорите, ова не е прашање на денот, овојпат прашањето е чисто реторичко. Од досегашното искуство со различни состави во „таканаречената“ Антикорупциска, со сигурност може да потврдиме дека ДКСК секогаш може да падне уште пониско, пробивајќи го дното со секое ново небулозно соопштение што ќе го објави.
Таман помисливме дека примерот на поранешниот претседател на ова антикорупциско тело, Горан Миленков, кој за време на неговот мандат, во 2016 година, криејќи го анкетниот лист на поранешниот премиер и лидер на ВМРО-ДПМНЕ Никола Груевски од новинарите .и јавноста, ќе ја даде „легендарната“ изјава: Најљубезно ве замолувам ова прашање да го затвориме ЗА ВЕК И ВЕКОВ, АМИН“, ќе биде некоја „црвена“ или подобро кажано, „црна“ линија под која антикорупционерите во иднина нема да одат, и… ТАГАУ (ви звучи познато, нели), стигна ново пробивање на дното. Овојпат во ликот и делото на Цвета Ристовска, членка на ДКСК со (до вчера) тесни врски со Факултетот за туризам – Универзитет „Скопје“, каде предавала, била член на управен одбор, асистентка на деканот, и сосема случајно, токму на неа ѝ бил доделен предметот за Христовски, во кој по анонимна претставка беше оспорена и факултетската диплома од Универзитетот „Скопје“.
И нормално, Антикорупциска одлучи по предметот кој го водеше Цвета и секако, по нејзин предлог, одлуката се отфрли, по што Ристовска ноншалантно, со доза на триумфализам, соопшти дека со дипломите на директорот на АНБ се е Оу-Кеј.
Ма каков судир на интереси, какви бакрачи. Ко то каже, ко то лаже, па Цвета е честа како…цвет. И по силните реакции на јавноста, наместо ДКСК едноставно да се самораспушти, продолжи да се посипува со пепел, изнесувајќи небулозни тврдења дека Цвета не била дел од наставниот кадар, ама сепак била, но целата нејзина активност во дотичниот универзитет – предавањата, членството во управниот одбор, улогата на асистентка на деканот- го вршела про боно, што ќе рече за беспари, за џабе. Изгледа дошло време за наплата.
Ах да, за малку ќе заборавев. Како дел од претставката поднесена за директорот на АНБ која ја отфрли ДКСК, и Цвета Ристовска, е и ТОЕФЕЛ сертификатот на Христовски од училиште за англиски јазик во Пловдив кое веќе не постои, а и додека постоело немало лиценца за издавање такви сертификати, епа и Цвета поднела доказ за познавање јазик, за кој јавноста прашува дали е од истата продавница за сертификати од Пловдив, и го бара на увид.
Се чини дека ДКСК, возобновувајќи ја недопирливоста на функционерите од новата владејачка номенклатура, во истата „каста“ си ги става и сопствените членови.
Текстот е личен став на авторот
ПРОЧИТАЈТЕ И:
