Христијан Мицкоски уште на почетокот на својот мандат ги разочара очекувањата на неговите гласачи (граѓаните). Најголем дел од ветувањата за државната надворешна политика, економија и социјална благосостојба, според политичките аналитичари, со кои разговараше „Фронтлајн“, се покажува дека биле алатка за изборна измама – само за да се добијат гласови.
– Лошиот старт на новата влада на Мицкоски се должи, пред сè, на лажните ветувања на ВМРО-ДПМНЕ во изборната кампања за бришење на придавката „Северна“ – односно негирањето на Преспанскиот договор кој сега, откако седнаа на Илинденска број два, и за нив јавно е реалност. И промената на Француската рамка за преговори со ЕУ кои ја ветуваа во кампањата јасно е дека е невозможна. Им служела само за привлекување гласачи, изјави за „Фронтлајн“, Ацо Кабранов – долгогодишен новинар и политички аналитичар.
Исто така, додава нашиот соговорник, и ветувањата за поголеми плати излезе дека се празни ветувања. Наставниците извисија, а оправдувањето е дека немало пари. Исто е со здравствените работници, а битката со ССНМ за покачување на минималецот на 450 евра веќе создава тензии по неуспешниот обид да го сменат лидерот на синдикатот со нивниот послушник, кој пред 7 години ја изгуби функцијата претседател на ССНМ.
– Едноставно Мицкоски ветуваше многу а уште во старт се гледа дека неможе да ги исполни, подвлече Кабранов.
Според него, најавите на Мицкоски дека ДУИ ќе ја дестабилизира државата оваа есен се блеф од премиерот кој е опседнат во оцрнување на партијата на Ахмети која не е воопшто невина во долгиот периот на владеење, но не се плашило какво што секојдневно ги прави Мицкоски.
– ДУИ е меѓу ретките негови изборни ветувања кое го исполни – дека ќе ги исфрли од власт, подвлече нашиот соговорник.
Бугарскиот новинар и познавач на релациите Скопје – Софија, Александар Марков, за „Фронтлајн“ вели дека повторното преговарање преку анекси или преку какви било промени итн., на „Францускиот предлог“, е невозможен, затоа што ќе бара согласност од сите 27 земји-членки на ЕУ.
– Тоа е невозможно. Факторите во ЕУ, вклучително и амбасадорот Дејвид Гир, постојано укажуваа дека нема да се обезбеди нова преговарачка рамка за Република Северна Македонија. Тоа е она што беше договорено во 2022 година. Бидејќи г. Мицкоски многу добро ги знае знае овие позиции, вистинското прашање е – дали тој всушност сака Република Северна Македонија конечно да ги започне преговорите со ЕУ или не? Во овој момент, се чини дека одговорот е не. Ова го приближува Скопје до позицијата во која е Белград во однос на интеграцијата на Србија во ЕУ. Имаат и уставни измени со задоцнет ефект, изјави Марков за „Фронтлајн“.
Невозможно е, потенцира нашиот соговорник, затоа што во преговарачката рамка се наведува дека вистинските преговори почнуваат откако ќе се изгласаат овие измени.
– Уставните измени се навистина само една алка во сложениот синџир на аранжмани. Ако овој прв чекор е тешко да се направи веќе две години, како ќе се преземат другите? Како што велат во Кина: „И најдолгото патување започнува со еден чекор“. Зарем не е време тоа да се направи? Граѓаните на РСМ го заслужуваат тоа, вели тој.
Владата на 18 јули 2023 го достави Предлогот за уставни измени до Собранието. Интервенциите во Уставот се однесуваат на додавање делови од народи во Преамбулата и членовите 49 и 78 од Уставот, при набројувањето на деловите од народи во државата.
Вметнувањето на Бугарите во Уставот е услов за продолжување на преговорите на земјава за членство во Европската Унија. Уставот може да се измени со двотретинско мнозинство во 120-членетото Собрание.
На потребата од донесување на уставните измени укажуваат претставници на Меѓународната заедница кои во изминатиот период упатуваат пораки дека промената на Преамбулата е гаранција за отворање на преговорите на Северна Македонија со ЕУ и дека целиот процес треба да се демистифицира и дека преку него нема да се изгуби идентитетот, јазикот или историјата.
Дестан Јонузи
Извор: ФРОНТЛАЈН
