Владата на Обединетото Кралство ја објави Стратегијата за нулта емисии, со која се утврдува како ќе достигне нулта емисии на штетни гасови до 2050 година, а притоа ќе обезбеди 440.000 добро платени работни места и инвестиции од 90 милијарди фунти во 2030 година.
Како што соопштија од Британската Амбасада, Стратегијата ќе помогне и во намалувањето на зависноста на Обединетото Кралство од увезените фосилни горива, а ќе ги заштити потрошувачите од глобалните скокови на цените со зголемување на чистата енергија.
Инаку, сето ова е во пресрет на подготовките на Обединетото Кралство да биде домаќин на Самитот на ОН COP26 следната недела, каде што премиерот ќе ги повика и другите светски економии да изготват сопствени национални планови за намалување на емисиите.
-Врз основа на Планот од 10 точки на премиерот, денешната стратегија за нулта емисии на Обединетото Кралство поставува сеопфатен економски план за тоа како британските бизниси и потрошувачи ќе бидат поддржани во транзицијата кон чиста енергија и зелена технологија-намалување на британската зависност од фосилни горива преку инвестирање во одржлива и чиста енергија во Обединетото Кралство, намалување на ризикот од високи и нестабилни цени во иднина и зајакнување на нашата енергетска безбедност, соопштија од Британската амбасада.
По објавувањето на Стратегијата за нето емисии, истата е доставена до Рамковната конвенција на Обединетите нации за климатски промени (UNFCCC) како втора долгорочна стратегија за развој на ниско ниво на гасови со ефект на стаклена градина во Обединетото Кралство според Парискиот договор.
-Со преземените обврски ќе се одвојат до 90 милијарди фунти приватни инвестиции до 2030 година и ќе се поддржат 440.000 добро платени работни места во зелените индустрии во 2030 година. На овој начин ќе им се гарантира не бизнисите кои ќе го поддржат Обединетото Кралство дека ќе предничат во поглед на најновите технологии за ниско ниво на јаглерод – од топлински пумпи до електрични возила – и во развој на просперитетна зелена индустрија во нашите индустриски средини – од издвојување на јаглеродот до водород, поддржано со новиот начин на финансирање, велат од Британската Амбасада во Скопје.
Оттаму посочуваат дека како дел од стратегијата, новата инвестиција објавена денеска вклучува и дополнителни 350 милиони фунти од нивната заложба до милијарда фунти за поддршка на електрификација на возилата во Обединетото Кралство и нивните ланци за снабдување, и уште 620 милиони фунти за целни грантови и инфраструктура за електрични возила, особено локални улични пунктови за станбени населби, со планови за вклучување на илјадници автомобили и комбиња со нулта емисија на штетни гасови на патишта во Обединетото Кралство преку мандат за возила со нулта емисија на штетни гасови.
Исто така, Обединетото Кралство ќе работи и на почнување на комерцијализацијата на одржливото воздухопловно гориво (SAF) направено од одржливи материјали како што се секојдневниот отпад од домаќинствата, димните гасови од индустријата, издвоениот јаглерод од атмосферата и вишокот електрична енергија, кои произведуваат над 70 отсто помалку емисии на јаглерод од традиционалното авионско гориво врз основа на животниот циклус.
-Политиките и трошоците изнесени во Стратегијата за нулта емисии значат дека од Планот во десет точки, ние мобилизиравме 26 милијарди фунти владини капитални инвестиции за зелената индустриска револуција. Исто така, повеќе од 5,8 милијарди фунти странски инвестиции во зелени проекти беа обезбедени од започнувањето на Планот во десет точки, заедно со најмалку 56.000 работни места во чистите индустрии во Обединетото Кралство – и уште осумнаесет зделки беа поставени на Глобалниот инвестициски самит за поддршка на растот во виталните сектори како што се енергијата од ветерот и водородот, одржливите домови и издвојувањето и складирањето на јаглеродот, соопштија од Британската амбасада.
Оттаму посочуваат дека преку мерките за енергетска ефикасност, падот на трошоците за обновливите извори исто така значат дека сметките за енергија на луѓето ќе бидат пониски до 2024 година во споредба со сметките кои би ги плаќале доколку не било преземено ништо особено во време кога растат цените на горивото.
Според амбасадорката на Обединетото Кралство во земјава, Рејчел Галовеј, Стратегијата на Обединетото Кралство за нулта емисијата дава пример за другите земји за зелена реконструкција во битката која ја водат кон постигнување на нулта емисии.
-Ги поддржавме институциите во Северна Македонија во развивањето на Националната стратегија за енергија и планот за нејзината имплементација, кој го одредува националниот пат за транзиција кон зелена енергија. Ќе продолжиме да работиме заедно кон одржлив развој и зголемена транзиција кон производство на зелена енергија, истакна Галовеј.
