„Откриј, запомни и сподели“ е годинешново мото за настаните што ќе бидат организирани по повод Светскиот ден на аудиовизуелното наследство, од светските филмски архиви, музеи и институции кои работата во сферата на заштитата на културно наследство. Македонскиот дел од одбележувањето ќе се одржи во Кинотеката на Македонија, на 27 октомври, како дел од светската иницијатива на УНЕСКО и на Координативниот совет на здруженија на аудиовизуелни архиви
Во петок, во периодот од 11 до 14 часот, во Кинотеката ќе бидат отворени работни простории и депоа за студенти, ученици, колеги од сродните институции и од Секторот за заштита на културното наследство, како и за граѓаните.
Во киносалата ќе се одржи проекција на филмот „Македонија во слики“ на Арсени Јовков од 1923 година, а предавање за филмот, ликот и делото на Арсени Јовков ќе одржи д-р Атанас Чупоски, виш филмолог во Кинотеката.
Филмовите на Бранко Гапо – „Денови на искушение“, „Време без војна“, „Истрел“, „Најдолгиот пат“, „Македонска сага“ и „Време“ ќе бидат издадени како дигипак-комплет и ќе бидат достапни на македонската јавност.
Стручни лица од Кинотеката на Македонија ќе учествуваат на меѓународната конференција за хрватското филмско наследство, што ќе се одржи на 26 и 27 октомври во Државниот хрватски архив во Загреб. М-р Игор Старделов, виш филмолог и Владимир Ангелов, виш филмолог и в.д. директор на Кинотеката на Македонија, ќе учествуваат на панел-дискусии, а претставник на Управата за културно наследство на Република Македонија ќе биде Мими Ѓоргоска-Илиевска, која исто така, ќе земе учество на панел-дискусијата со наслов „Европски искуства и практики во зачувувањето на филмското наследство“.
27 Октомври беше избран како Светски ден на аудиовизуелното наследство од УНЕСКО во 2005 година, а целта е подигнувањето на јавната свест за институциите кои помагаат да се зачува овој вид културно наследство и покрај многуте фактори што го згрозуваат неговиот опстанок.
Настанот ќе биде обележан во повеќе од 70 различни места низ светот, а во соседството, во Србија, Босна и Херцеговина и Бугарија.
А. Петровска
