Продолжува говорот на омраза, но и закани по живот кон активистот за човекови права и слободи, Џабир Дерала и невладината ЦИВИЛ. Во коментари на текстот на Дерала насловен „Претпазлив поглед кон иднината“ (објавен на 31 декември 2022 година) на Фејсбук страната на ЦИВИЛ, има низа на коментари со недолична содржина, но и закани за „пресметка со неистомислениците по кратка постапка како во ’45“.
Имено, додека целиот демократски свет се подготвуваше да прославува Нова година, дел од партиските тролови имаа задача да се закануваат.
Извесен Миле Јанковски од Скопје, со живеалиште во Мелбурн, Австралија, според неговите Фејсбук станици (ги има неколку), наместо да јаде сарми за Нова година, тој реши (самоволно или по наредба) да се заканува дека „предводниците на невладиниот сектор кои се финансирани од САД, кои според него го направиле најголемиот злостор на оваа држава, набрзо ќе завршат во доживотен затвор“.
Додека извесен Михајло Апостолски (најверојатно е лажен профил), му реплицира на Јанковски во коментар и вели:
„Каков доживотен затвор. Прво голем арч, многу се бре брате, кај ќе ги сместиме. Најарно ко ’45 по кратка постапка, најекономично е…“.
Ова се само дел од коментарите со говор на омраза и закани кон луѓето на ЦИВИЛ. Во следните прилози ќе објавиме уште коментари од нашите „верни читатели“ кои 24 часа „дежураат“ на Фејсбук страницата на ЦИВИЛ и шират партиска, антиевропска и руска пропаганда.
Време е да ги направиме „славни“, а институциите да почнат да си ја работат работата, односно да ги санкционираат сите кои шират говор на омраза и поттикнуваат дела од омраза!
ЦИВИЛ Мониторинг тим
