Германија вчера ја разбуди масивна полициска акција. Уапсени се 25 припадници на домашна ултрадесничарска и терористичка организација во рација ширум Германија. Во полициската акција учествуваа 3.000 припадници на полицијата во 11 сојузни држави, каде што беше извршен претрес на 130 локации. Една поранешна парламентарка (во мандатот 2017-2021 година) од ултрадесничарската партија АФД е меѓу уапсените. Двајца се уапсени надвор од границите на Германија – во Италија и Австрија.
Целта на терористичката група било „да се урне постојниот државен поредок во Германија и да се воспостави нов сопствен облик на држава, чиишто контури се веќе разработени,“ како што соопштија од грманското федерално обвинителство.
На оваа тема разговаравмe со доктор Волфганг Ресман, претседател на Bundesverband Bürgermedien – организација на канали со јавен пристап во Германија, кој во моментот е во Македонија во рамки на проектот „Отпорно новинарство во борба против дезинформациите и пропагандата“ што ЦИВИЛ го спроведува заедно со Младите за медиумите (Германија).
Др. Ресман посочи дека рацијата од ваков размер во Германија покажува дека десничарскиот тероризам и десничарските активности се реална опасност за демократскиот развој, во Германија и во други земји, и покажува дека постои радикализација на оваа сцена.
„Не бев изненаден од тоа што една поранешна членка на парламентарната група на АФД, таканаречената алтернатива од Германија, беше една од главните на оваа група, планирајќи дури и државен удар и користејќи го нејзиното знаење како поранешна пратеничка за да се снајде низ зградата на германскиот парламент, како и од тоа што имаме и еден Русин, едно лице е од Русија, таа, исто така, е уапсена, затоа што оваа група сакаше да преговара со Руската Федерација.
Исто така, ова покажува како работите функционираат заедно. Ја имаме оваа десничарска сцена, ја имаме парламентарната група на АФД во германскиот парламент, во многу државни парламенти, во сојузните покраини на Германија, а ги имаме и нивните мостови до навистина опасни десничарски лица кои стануваат терористи, или кои би можеле да станат терористи. Да се планира државен удар, со конкретни планови, да, тие се прилично конспиративни и се поврзани со дел од обезбедувањето, полицијата и правдата итн.
Овој поранешен член на АФД беше судија, ова е една страна, а ние мора да бидеме многу будни во однос на овие десничарски активности. Од друга страна, мислам дека е добар знак тоа што германската полиција успеа да го сопре целото планирање, што ги знаеше лицата, или што имаше неколкумина зад сцената, и што успеа да уапси 25 од овие активисти, мислам дека претресоа 42 лица.
Ова покажува дека безбедноста во Германија функционира, полицискиот систем функционира, има притисок врз десницата, врз десничарските екстремисти кои може да станат терористи. Значи, тоа претставува опасност. Врската со Русија повторно е една од корените на ова движење и мора да сме многу, многу внимателни кон градењето на мостови кон терористи на оваа парлементарна група на АФД“, објасни др. Ресман.
Биљана Јордановска
камера и монтажа: Самуел Дебус/OK-TV Ludwigshafen
