Владата на 57 седница во март месец ја усвои Националната стратегија за спречување на насилен екстремизам 2018-2022 и Националната стратегија за борба против тероризам 2018-2022.
Овие документи Владата ги изработи поради потребата да се пренесат активностите на насилниот екстремизам и радикализација на полето на превенција преку општествен институционален пристап.
На веб страницата на Владата можат да се најдат и двата документа. Според нив остварувањето на предвидените активности против насилниот екстремизам и тероризам предвидуваат пред сѐ разбирање на опасностите од маргинализација, економски тешкотии и закани од поделби на заедницата, доверба во заедниците и меѓу заедниците и полицијата и другите владини органи, постигање повисоко ниво на соработка меѓу државните и локалните институции во борбата против насилниот екстремизам и тероризам, конвергирање кон меѓународните стандарди и хармонизирање на националното законодавство и прописи со Европската Унија, ОН, ОБСЕ и други меѓународни партнери.
Што се однесува до средствата потребни за имплементација тие ќе бидат одвоени од државниот буџетот со претходна финансиска проценка и преку меѓународна донаторска поддршка.
„Стратегијата и Акциски план за спротивставување на формите на радикализација што може да доведат до насилен екстремизам и тероризам ја отсликуваат и потврдуваат нашата посветеност кон нови, сеопфатни и холистички, превентивни пристапи на начини што се надгледуваат и се прифаќаат како легитимни од страна на граѓаните на Република Македонија. На овој начин ќе се издигнеме над овие предизвици, ќе се соочиме со нив и ќе ги надминеме со: Силни семејства, … Силни заедници,… Силна држава!“, се вели во заедничката изјава на Борче Петревски, национален координатор за СНЕБПТ и на Џеладин Ајвази заменик-национален координатор за СНЕ (Акцискиот план за спречување на насилен ектремизам).
Во контекст на националните стратегии, за потсетување, на панел дискусијата „Македонија во НАТО: Задачи, предизвици и можности“ во организација на ЦИВИЛ на прашањето „Дали опасноста од тероризам ќе се зголеми со влезот во НАТО?“, говорниците Радмила Шекеринска, министерка за одбрана, Стево Пендаровски, национален кординатор за НАТО, Сашо Орданоски, полтиички аналитичар и Даниела Баришиќ, амбасадорка на Хрватска во Македонија, сметаа дека глобалниот тероризам бара глобално решение, а влезот во НАТО може да придонесе во борбата против тероризмот, но не и да ја рангира Македонија повисоко на црната листа на терористички напади.
Пендаровски, исто така, нагласи дека борбата треба да се насочи и кон религиозниот тероризам, бидејќи во светот Макеоднија е најризичен регион за развој на овој вид терористички закани и напади.
Националните стратешки документи се изработени од Националниот комитет за спречување на насилен екстремизам и борба против тероризам раководен од Национален координатор за спречување на насилен екстремизам и борба против тероризам, заменик Национален координатор за спречување на насилен екстремизам, заменик Национален координатор за борба против тероризам, а во комитетот партиципираат 22 членови и 22 заменици членови кои се постојано вработени во 21 Министерство и институции на Република Македонија.
Биљана Јордановска
