Помина многу време откако сè започна. Преку брда и планини, реки и мориња, беше тешко но, успеавме да им го овозможиме најдемократското право на граѓаните. Право на непосредно одлучување, референдум!
Тоа право неколку луѓе можеа со едно кревање на рака да го овозможат за пет минути. Наместо пет месеци! И сите ќе бевме среќни и задоволни и досега ќе им ги пакувавме куферите на профитерите.
Граѓанската иницијатива „Спас за Општина Валандово” помина низ сè, за да стигнеме до недела, 20 август, денот на референдумот. Активистите поминаа низ закани за тужба, низ секакви притисоци, оцрнувања и омаловажувања, деградирање на личности и семејства, и ред други работи кои валандовчани не нѝ можеа да ги помислат, а не – да ги почувствуваат. Вакви притисоци нема ниту за парламентарни и локални избори!
Што е вистинската причина, знаат само неколкумина.
Градоначалникот остави црна дамка во историјата на Валандово, не ги поддржа граѓаните и напротив, им се спротистави на валандовчани, кои меѓу другото, го гласаа во три мандати. Не само што им се спротистави, туку и водеше активна црна кампања против граѓанската иницијатива, плашејќи ги жителите дека ќе плаќаат по 3.000 евра од домаќинство, ако успее референдумот. За да го демантираме тоа на Фејсбук страницата на иницијативата го објавивме договорот склучен помеѓу државата и инвеститорот, во кој никаде не се спомнува плаќање некакви средства, во случај на раскин на договорот. Напротив, државата може да го раскине договорот бидејќи инвеститорот ги нема исполнето неговите обврски во изградбата на рударскиот комплекс.
Црната дамка на бела кошула ќе се испере, но дамката што несовесните луѓе ќе ја остават зад себе, ќе стои долго време, и тешко кој ќе може да ја тргне од историјата.
Вечерва е последната трибина на граѓанската иницијатива и за финале го оставија градот Валандово.
Вечерва во Валандово повторно ќе се појави сјајот во очите на граѓаните од радост и среќа, вечерва повторно ќе заживеат младинскиот дух и енергија, повторно ќе направиме културата да се врати во градот.
Активистите на оваа иницијатива се пример за секој политичар како се сака својот дом. Имаа срце – планина и пред ништо и никого не потклекнаа, бидејќи го носат духот на градот. А граѓаните тоа го препознаа и го наградија со неизмерна поддршка, поддршка кој пристигнува од секаде низ светот.
„Спас за Општина Валандово” е авангарда во градот изминативе 5 месеци, нешто различно и вистинско.
Се гледаме на референдумот, луѓе со големи срца.
20-ти август, недела. ГЛАСАМ ПРОТИВ!
Владимир Лазов
