ВЕСТ НА ДЕНОТ
Во Изборниот законик да се внесе преодна одредба да важат старите важечки документи за овие избори
ДИК предлага во Изборниот законик да се внесе преодна одредба со која ќе се овозможи на овие избори да се гласа и со старите важечки документи…
ИЗЈАВА НА ДЕНОТ
Пендаровски: Лажни се анкетите на ВМРО-ДПМНЕ
-Реалните анкети што тие не ги даваат во јавноста се дека тие се паднати под 45 пратеника, а ние сме над 50. Не е воопшто случајно денешниот резултат на СДСМ во собирањето на потписите. Трендовите од пред извесно време се променети, рече Пендаровски.
ФЛЕШ ВЕСТИ
НАТО ВЕЖБА Алијансата спроведува голема вежба на подморници наречена „Динамичка манта 24“ во Средоземното Море, во близина на италијанскиот остров Сицилија.
НЕПРАВИЛНОСТИ ВО МНАВ Тројцата инспектори од Државниот инспекторат за труд (ДИТ) по двонеделниот надзор на четирите огласи за вработување во М-НАВ констатирал неправилности…
ДИК Државната изборна комисија може да функционира со шест члена, тоа е согласно Деловникот, изјави денеска претседателот на ДИК Александар Даштевски, одговарајќи на новинарски прашања …
ВОЈНА ВО УКРАИНА
-
Загинати цивили, меѓу кои и деца во руските напади врз станбени блокови во Одеса, Херсон, Донецк…
КОНФЛИКТИ
- Камала Харис, упати досега најжестоки критики за политиката на Израел кон Палестинците. Харис нагласи дека „она што се случува секој ден во Газа е поразително“…
- Досега се убиени 30.534 Палестинци во израелските напади на Појасот Газа, од кои 124 само во последните 24 часа, …
АЛ-ПРЕС
Редакциски избор од албанските медиуми во регионот
Во Албанија ( Кучове) денеска свечено ќе се отвори воената база на НАТО со модерна инфраструктура за воените авиони на Алијансата, додека пред неколку дена беа склопени 3-те вооружени беспилотни летала „Бајрактар“, купени во Турција, пренесуваат албанските медиуми.
Русија не сака процесот на дијалог меѓу Косово и Србија да заврши успешно според проектите на Западот, се вели во извештајот објавен на 1 март во Приштина на Косовскиот институт за истражување и развој на политики (КИПРЕД), пренесуваат косовските медиуми.
ГОДИНИ НА ХЕРОИЗМОТ
Две години херојство на Украина: Значаен настан кој ги одбележа храброста и гордоста и го упати погледот кон иднината
„Украина- две години хероизам“ е насловот на годинешната мултимедијална конференција што се одржа на 26 февруари, во организација на Амбасадата на Украина, во соработка со ЦИВИЛ- Центар за слобода, во Музејот на македонската борба за независност.
Мултимедијалниот настан собра на едно место голем број дипломати од целиот свет, македонски политичари и интелектуалци, кои со своите обраќања ја потврдија безрезервната поддршка за Украина и украинскиот народ, и му порачаа на светот дека поддршката во секаква форма ќе продолжи до крајот на војната.
Бомгартнер: Не смееме да дозволиме рускиот режим да победи во оваа војна, мораме да победиме поради самата Украина
Ова треба да бидат моменти на среќа, но ова не е, ова е тажен момент, две години откако Украина беше нападната неправедно, посочи амбасадорот на Република Франција Сирил Бомгартнер, на конференцијата „Украина: Две години хероизам“ , што се одржа 26 февруари, 2024 година во организација на Украинската амбасада во соработка со ЦИВИЛ -Центар за слобода.
Џафери: Поддршката на Украина ќе продолжи да биде во нашиот фокус, во оваа Влада има пријател и партнер
„Тешко наоѓа човек соодветни зборови за годишнина од тековна војна и човечко страдање. Војна која мислевме дека е завршена приказна на европско тло, но сепак поради храбриот украински народ имаме човечка обврска да разговараме, да ја изразиме гласно нашата поддршка, да пратиме порака дека сме покрај нив, дека не сме ги заборавиле, дека се во нашите мисли. За да продолжат да бидат толку горди и да пружат отпор при чувањето на своето“, изјави Талат Џафери, технички премиер на Република Северна Македонија на конференција „Украина: Две години хероизам“ организирана од Амбасадата на Украина во соработка со ЦИВИЛ.
Река: Значајно е украинскиот народ да чувствува и знае дека не се сами, ние стоиме со нив и ги поддржуваме
„Имав можност да испорачам сличен говор на оваа почитувана публика пред една година и тогаш никогаш немаше да помислам дека денеска ќе стојам овде пред вас повторно. Покрај земјите од ЕУ, САД и членките на НАТО нашиот регион беше силно наклонет да стои покрај Украина и со нејзиниот народ… Украинскиот народ треба да знае дека не е сам“, рече амбасадорот на Република Албанија, Фатос Река на конференцијата „Украина – две години хероизам“, организирана од Амбасадата на Украина во соработка со ЦИВИЛ.
Османи: Украина останува најважниот приоритет, која се бори не само за својата, туку и за нашата слобода
“Две години од целосна инвазија и агресија на Руската Федерација кон мирољубив сосед. Две години смрт, деструкции и човечки страдања. Две години агресија во Европа во 21 век, но и две години обиди за руско минирање на демократиите и демократските процеси низ Европа. Но тоа што е најважно, две години херојство на украинскиот народ и раководството на Украина, издржливост и отпорност“, изјави министерот за надворешни работи Бујар Османи, на конференцијата „Украина – две години хероизам“, организирана од Амбасадата на Украина во соработка со ЦИВИЛ.
АНАЛИЗИ
На први март, државната информативната агенција МИА, објави содржина, со наслов „Помошта за Украина ги претвора Шолц и Макрон во отворени непријатали, за која се вели дека е пренесена од Политико, без притоа да се наведе линкот до изворот на веста. Неколку македонски портали ја презедоа веста, по принципот „copy – paste“, без проверка, повеќето од нив дури и со истата печатна грешка во насловот „непријатели“, несвесни дека, иако доаѓа од државна информативна агенција, во себе содржи дезинформации, манипулации и наведувачки наративи како оние кои ги користат руските пропагандисти за да нанесат штета на Украина и помошта која и ја пружаат сојузниците, меѓу кои и Северна Македонија како членка на НАТО, пишува Драган Мишев в.о анализата „Руските наративи во македонските медиуми: Изгубени во преводот“
СЛОБОДНА ЗОНА
Некогашниот директор и косопственик на МПМ, Срѓан Керим ( долгогодишен близок соработник и деловен партнер на Орце Камчев, финансиерот на ВМРО ДПМНЕ назначен на црната листа на САД) осомничен од Основното јавно обвинителство за гонење организиран криминал и корупција (ОЈО ГОКК) за сторена „Злоупотреба на службена положба и овластување“, согласно член 353 од Кривичниот законик, за „Оштетување или повластување на доверители“ од член 257 став 3 од КЗ и за „Намерно предизвикување на стечај“!, директен виновник за згаснувањето на дневните весници „Утрински весник“, „Вест“ и „Дневник“ и неделникот „Теа Модерна“, поради кого без работа и со неисплатени плати останаа неколкуте стотици новинари и технички персонал вработени во „Медиа Принт Македонија“, и печатницата „Графички центар Скопје (ГЦС), во сопственост на МПМ, се појави како делегат на конвенцијата на ВМРО – ДПМНЕ. пишува Драган Мишев во колумната: „ И по Камчев – Керим: Ништо ново во ВМРО – ДПМНЕ.“
Подготви: Д. Мишев