Повеќе од дваесет граѓански организации кои на прес-конференција минатата недела информираа за притисоците со кои се соочуваа во изминатиот период и за речиси секојдневната контрола од Управата за јавни приходи и Финансовата полиција, писмено се обратија и до претседателот на Државната комисија за спречување на корупција, Игор Тантуровски.
„Шестмесечните контроли на Управата за јавни приходи и Финансиската полиција на МВР во дваесет и двете граѓански организации и фондации ги инцирала Државната комисија за спречување корупција. Информацијата што лично, на 30 мај ја соопшти првиот антикорупционер, Игор Тантуровски и притоа откри дека Државната комисија за антикоруција (ДКСК) прва формирала предмет од кој започнал прогонот на невладините, наиде на револт и протест кај овие граѓански организации и фондации. Организациите кои се под повеќемесечна напорна контрола се револтирани од фактот што Тантуровски покажува и тотално непознавање за начинот на нивното функционирање и работа, кога на соопштувањето на резултатите од мониторингот на работата на Антикорупциската комисија од страна на МЦМС, подсмешливо го коментира интересот на ‘амбасадор на голема институција’ кој ја посетил ДКСК и сугерирал дека право на контрола врз овие граѓански организации имаат нивните донатори“, се вели во реакцијата на граѓанските организации.
„Ако подобро ја познава работата на НВО-секторот, тогаш Тантуровски ќе знае дека секој домашен и странски донатор што одлучил да поддржи проект и дал финансиска поддршка на невладина организација, пропишал правила според кои грантистите се обврзуваат да му подготвуваат детални месечни, квартални и годишни, наративни и финансиски извештаи. На тој начин се следат трошењата на парите од страна на грантистите“, стои во соопштението.
Изјавата на Тантуровски во која тој се исплашил од влезот на пари за тероризам во Македонија, преку граѓански организации и фондации, тие ја оценуваат како апсурдна и смешна.
„Образложението на Тантуровски иако е апсурдно и смешно, покажува на сериозен проблем дека ДКСК, наместо да ја врши работата за која е платена од народни пари и да трага по стотиците веќе откриени коруптивни скандали на политичари, државни институции или јавна администрација, се вплеткува во спроведувањето на груевистичките методи за линч на неистомислениците“, сметаат потписниците на соопштението.
Граѓанските организации кои беа под постојан притисок и контрола бараат од ДКСК да се ангажира и да спроведе постапка за невалдините организации кои добивале пари од Владата и да провери како тие ги трошеле народните пари во последните години.
Тие предлагаат и Тантуровски да почне од последната распределба, објавена во Службен весник на Република Македонија на 23-ти мај, во вредност од 800.000 евра, а распределени на главно непознати граѓански организации во Македонија.
М. Т.
