ВЕСТ НА ДЕНОТ
Северна Македонија со помала просечна инфлација од Бугарија
Годишната стапка на инфлација во ноември забави на 19,5%, со што просечната годишна инфлација во периодот јануари – ноември 2022 година изнесува 13,8%, соопшти Народната банка. И натаму околу 76% од овој раст е директен ефект од растот на цените на прехранбените производи и на енергијата. Неизвесноста од идната динамика на цените на примарните производи на берзите, а особено на енергентите е нагласена поради воените случувања во Украина и санкциите кон Русија, анализира НБРМ.
ИЗЈАВА НА ДЕНОТ
ВОЈНА ВО УКРАИНА
Кијив повторно нападнат со беспилотни летала
Украинските единици за противвоздушна одбрана соборија уште еден непријателски дрон Шахед над главниот град Кијив, објави градската воена управа на Киев на Телеграм, јавува дописникот на Укринформ.
Кулеба: Русија може да започне голема офанзива на почетокот на 2023 година
Русија се подготвува да изврши голема офанзива во првите неколку месеци од 2023 година, изјави украинскиот министер за надворешни работи Дмитро Кулеба, говорејќи пред новинарите од засолништето за бомби во центарот на Кијив, јавува дописникот на Укринформ, повикувајќи се на The Globe and Mail.
РЕГИОН
ЕУ мора да го искористи геополитичкиот момент на Балканот: Руската инвазија на Украина конечно ја разбуди Европската унија за стратешкото значење на Западен Балкан и потенцијалот на Москва да ги искористи нерешените спорови во регионот за да го поткопа Западот, пренесува Политико.
(ИЗБОР) Албански медиуми: Во Украина петиција за признавање на Косово, првите чекори за членство во ЕУ, реакција на Вучиќ по апликацијата на Косово за членство во ЕУ
Косово го потпиша барањето за членство во ЕУ: Претседателката на Косово Вјоса Османи, претседателот на Собранието Глаук Коњуфца и премиерот Албин Курти денеска го потпишаа барањето за членство на Косово во Европската унија (ЕУ), пренесуваат косовските медиуми. Косовската претседателка Османи, барањето за членство во Европската унија го смета за „историски ден“.
27 години од потпишувањето на Дејтонскиот мировен договор: На денешен ден, 14 декември 1995 година, во Елисејската палата во Париз беше потпишан Дејтонскиот мировен договор, со кој, според договорот постигнат на 21 ноември истата година во Дејтон, СAД, официјално заврши војната во Босна и Херцеговина.
СВЕТ
Иран осуди 400 луѓе на затворски казни до 10 години
Бројките од провинцијата Техеран укажуваат на степенот на задушување на протестите предизвикани од убиството на Махса Амини. Судовите во и околу иранската престолнина осудија 400 лица под обвинение поврзани со неодамнешните протести, на казни затвор во траење до 10 години, пренесува Гардијан.
„Мета“ тужена за 1,8 милијарди долари за поттикнување насилството во Етиопија
Алгоритмот на Фејсбук помогна да се поттикне виралното ширење на омраза и насилство за време на граѓанската војна во Етиопија, се тврди во еден правен случај. Абрам Меарег, син на етиопски академик кој што беше убиен откако беше нападнат поради објави на Фејсбук, е меѓу оние што го покренаа случајот против Мета.
Репортери без граници: Зголемен бројот на новинари во затвори
Бројот на новинари во затвори годинава е 533, се наведува во годишниот извештај на невладината организација „Репортери без граници“. За споредба, лани бројот на новинари кои завршија во затвор беше 488.Зголемен е и бројот на убиени новинари. Годинава се 57. Лани беа 48, а во 2020 година – 50.
ФЛЕШ ВЕСТИ
ПРЕСУДА ВО КОРИСТ НА РОМИТЕ Родителите Роми чиишто деца биле сегрегирани во две основни училишта во Северна Македонија добија важна пресуда пред Европскиот суд за човекови права против Северна Македонија. Судот утврди дека две основни училишта, „Ѓорѓи Сугарев“ во Битола и „Гоце Делчев“ во Штип, го повредиле правото на децата на недискриминација (член 14) во врска со нивното право на образование (член 2 од Протоколот бр. 1).
ЛАЖНИ ЗАКАНИ СО БОМБИ Лажни биле денешните закани за бомби испратени на електронската адреса на 15 училишта во Скопје, информира Министерството за внатрешни работи. МВР ја известува јавноста дека се направени сите потребни проверки во врска со денешните пријави од училишта во Скопје, кои добиле порака на електронската адреса со закана за поставена експлозивна направа, и утврдено е дека станува збор за лажни пријави, се вели во соопштението од МВР.
ЕВРОПСКА МИГРАЦИСКА МРЕЖА Република Северна Македонија, како и повеќето европски земји се изложени на зголемена миграција во рамките на процесот на глобализација и имајќи ги предвид миграциските текови и нивното влијание врз демографскиот и социо-економскиот развој, се обидуваме на систематски начин да се вклучиме во европскиот глобален пристап за справување со миграциите и нивните предизвици, изјави денеска министерот за внатрешни работи Оливер Спасовски во онлајн обраќањето на состанокот на Европската мрежа за миграција.
ИНТЕГРАЦИИ Германскиот канцелар Олаф Шолц денеска нагласи дека е во интерес на Германија и Европа останатите земји од Балканот да се приклучат на Европската Унија.
НАМАЛУВАЊЕ НА ЦЕНИТЕ Веќе е почнат трендот на намалување на цените на основните прехранбени производи наведени во одлуката на Владата, а ќе се случи и кај другите производители откако ќе ги потрошат залихите на претходно набавените производи по повисоки цени, истакна денеска министерот за економија Крешник Бектеши.
АНКЕТА
Анкета: Граѓаните се свесни за бомбардирањето со дезинформации
Дезинформациите, како лажни, непроверени или неточни информации, го преплавуваат медиумскиот простор, но и социјалните мрежи. Пласирањето на дезинформациите, иако се случува да биде ненамерно, сепак, имаат одредена цел да наштетат, да се поиграат со емоциите на оние што ги восприемаат, да дефокусираат.
Анкета: Жално е што Скопје не е украсено како другите светски градови
Екипата на Фронтлајн спроведе анкета и ги праша граѓаните на Скопје дали треба градот да биде украсен за новогодишните празници. Граѓаните незадоволни од политиката на Град Скопје и сметаат дека на градот му фали новогодишна атмосфера.
ИНТЕРВЈУ
Самир Бехариќ, Балкан Форум: На Русија најголеми сојузници се неколкуте националистичките политички лидери од Западен Балкан
„На Русија најголеми сојузници се националистичките политички лидери кои ги има неколку во Западен Балкан и токму затоа треба да сме внимателни, мирот не е нешто со кое треба да се коцкаме исто како и демократијата и токму денеска можеме да видиме дека демократијата не е дестинација и цел, туку е патека која треба да се пешачи секој ден, а војната во Украина ни покажува што во некоја смисла фашизмот може да направи на глобално ниво“, вели Самир Бехариќ, претставник на иницијативата „Балкан Форум“ во Босна и Херцеговина, кој учествуваше на дводневната конференција на мрежата „Logex“.
СЛОБОДНА ЗОНА
Вујко Сем се изнервирал поради резултатите од обуките на кои ги подложил нашите правосудци. Изненаден бил дека и покрај неговата инвестиција нема дивиденда од тоа и покрај толкуте обуки правораздавачите си терат по старо. Ти на мене, јас на тебе и сите среќни и весели. Како секој паметен инвеститор сега ќе прави ревизија на инвестираните средства и ќе извлекува заклучоци од таа анализа. Не верувам дека толку го изнервиравме поради парите, туку изгледа во сликата направена од нивните пазлиња(сложувалки) не ја отсликуваме вистинската боја. Овде замерки нема и тоа е според сите узанси на нивниот менталитет кога се работи за вложувањето средства во политички проекти, пишува Војо Маневски во колумната „Обуки“
Д. Мишев