Израел ги продолжи борбите во Газа неколку минути по завршувањето на привремениот договор за прекин на огнот и го обвини Хамас дека го прекршил примирјето. Хамас го обвинува Израел, велејќи дека ги одбил понудите за ослободување на повеќе заложници.
Посредникот Катар во петокот рече дека се во тек напорите за обновување на примирјето меѓу Израел и Хамас и изрази „длабоко жалење“ поради продолжувањето на израелските бомбардирања, пренесува АП.
За време на седумдневното примирје беа ослободени над 100 заложници, од кои повеќето изгледаат физички добро, но потресени. Израел вели дека 115 возрасни мажи, 20 жени и две деца се уште се држат како заложници. 240-те Палестинци ослободени според примирјето беа главно тинејџери обвинети за фрлање камења и огнени бомби за време на конфронтациите со израелските сили.
Договорот што започна на 24 ноември заврши по една недела и повеќекратно продолжување, и покрај меѓународниот притисок примирјето да продолжи што е можно подолго. Неделните израелски бомбардирања и копнена кампања оставија искоренети повеќе од три четвртини од 2,3 милиони жители на Газа, што доведе до хуманитарна криза.
Речиси осумнеделната војна што му претходеше на затишјето во борбите предизвика широко распространето уништување и во Газа беа убиени повеќе од 14.800 луѓе, според палестинското Министерство за здравство на Западниот Брег, кое ги црпи своите податоци од здравствените власти во Газа управувани од Хамас. Меѓутоа, за следната рунда борби, САД јасно му ставија до знаење на Израел дека размерите на уништување не треба да се повторуваат.
Дали Израел ќе послуша е друга работа. Аналитичарите со кои разговараше Си-Ен-Ен велат дека војната ќе продолжи се додека Хамас не биде уништен, а овој пат може да биде многу пожестока.
Бени Ганц, кој е дел од воениот кабинет, во средата рече дека борбите „ќе се прошират секаде каде што е потребно низ Појасот. Нема да има градови за прибежиште“.
Не е јасно дали ќе има уште едно примирје, но со повеќе од 100 заложници кои се уште се во заробеништво на Хамас, кое теоретски би можело да се оживее неколку дена доколку двете страни се согласат да се продолжи за еден ден на секои 10 ослободени заложници, велат аналитичарите.
Во меѓувреме, САД вршат притисок врз Израел да ги избегне масовни цивилни жртви во следните рунди борби.
„Го истакнав императивот на Соединетите Држави да не се повторат на југ масивните загуби на цивилни животи и раселувањето од размерите што ги видовме во северниот дел на Газа“, рече американскиот државен секретар Антони Блинкен на телевизиска прес-конференција во Тел Авив во четврток.
Израел ги продолжи борбените операции против Хамас во Газа, обвинувајќи ја милитантната група за прекршување на нивниот договор. Хамас ги негираше тврдењата на Израел. Продолжувањето дојде неколку моменти по истекот на седумдневното примирје меѓу страните. Паузата во борбите овозможи ослободување на цивилните заложници од Газа и палестинските затвореници од израелските затвори.
Преговорите со катарските и египетските посредници за ослободување на заложниците продолжуваат и покрај обновувањето на непријателствата.
Во меѓувреме, ниту еден камион со хуманитарна помош не премина во Газа по завршувањето на примирјето, изјави за Си-Ен-Ен очевидец на преминот Рафах.
Како што пренесува Ал Џезира, десетици Палестинци загинаа откако Израел ги обнови нападите врз Газа по истекот на примирјето, според здравствените власти.
Израелската армија фрла летоци во кои им кажува на луѓето во деловите на веќе бомбардираната јужна Газа да се евакуираат, сигнализирајќи за проширување на офанзивата.
Во Кан Јунис, јужна Газа, палестинците во паника се обидуваат да ги извлечат луѓето од урнатините со голи раце откако обновените израелски воздушни напади погодија дом и ги уништени соседните згради.
Јумна Ел Сајед од Ал Џезира, известувајќи од Кан Јунис, вели:
„Неколку од спасувачките тимови кои се уште се достапни во јужниот дел на Појасот Газа пристигнаа во оваа област за да помогнат“.
Но, „Овие тимови за цивилна одбрана и спасувачки тимови ја немаат ни потребната механизација или алатки за да се обидат да ги спасат луѓето заглавени под урнатините“.
Ибрахим Хамдан, жител на Кан Јунис, изјави за Ал Џезира:
„Бевме дома…и одеднаш слушнавме звук на бомби што ја погодија куќата на нашиот сосед.
„Изтрчавме и видовме дека целиот блок е уништен. Над 10 домови беа оштетени од израелските бомбардирања… Семејствата успеаја да спасат некои деца. Се надеваме дека ќе преживеат“.
Д. Мишев
