ЦИВИЛ ја објави колумната на Сашо Орданоски „Да виси ДКСК“ во декември 2017, со што почнува разоткривањето на корупцијата во државната институција задолжена за спречување на корупцијата. Иронично, нели? Речиси истовремено со колумната на Орданоски, ЦИВИЛ излезе со соопштение во кое бара оставки од членовите на Државната изборна комисија и Државната комисија за спречување на корупција поради сознанијата до кои дојде ЦИВИЛ за корупција, злоупотреба на службената положба, несовесно трошење на јавните пари и мобингот во овие две институции.
Впрочем, колумната и бројните текстови објавени во ЦИВИЛ Медиа и соопштенијата на ЦИВИЛ, беа поттикнати токму од сериозните индиции дека злоупотребите ниту започнуваат, ниту завршуваат во ДИК, туку, молкот на ДКСК е симптом на многу подлабоки и посериозни проблеми кои ги следат државните институции.
Тогаш, ДКСК веднаш реагираше со барање за извинување од авторот и од ЦИВИЛ Медиа, со закана: „за ова ќе биде информирана Агенцијата за аудио и аудиовизуелни медиумски услуги, новинарски здруженија и сите релевантни институции кои вршат надзор врз работењето на медиумите, а повиците на линч се сериозен говор на омраза, кој е казнив со закон… ДКСК бара од вашиот медиум да се повлече конкретниот текст и јавно извинување од авторот, во спротивно ДКСК ќе покрене судска постапка против вашиот медиум и авторот на текстот.“
Одговорот на ЦИВИЛ и Орданоски не беше извинување туку аргументирано барање од членовите на ДКСК да си поднесат оставка.
ЦИВИЛ, на 15 декември 2017, поднесе барање за слободен пристап до информации од јавен карактер во период од 14 април 2015 ди датумот на поднесување, со кое се побара број на оформени предмети за корупција и кои предмети се работи, документација и информации за видот и вредноста на јавните набавки, вклучително и за набавка на комуникациска опрема, информација за висината на месечните примања за сите членови на ДКСК, висината на поединечните исплатени награди, хонорари или бонуси, како и патните трошоци, информација за исплатена прекувремена работа и информација за исплатените информации за репрезентација по член на ДКСК и вкупната сума.
Првиот одговор од нивна страна беше, всушност, известување за пролонгирање на законски дадениот рок, со образложение дека барањето на ЦИВИЛ подразбира прибирање на обемна документација за која е потребно дополнително време.
Во меѓувреме, ЦИВИЛ остана на ставот дека членовите на ДКСК, предводена од Игор Тантуровски, треба да поднесат оставка, затоа што, наместо да ја спречуваат, тие ја практикуваат корупцијата.
Инаку, дури и Специјалното јавно обвинителство веќе подолго време води сериозна истрага за работата на Антикорупциска. По алармирањето на јавноста со колумната на Орданоски, соопштенијата и истражувањето на ЦИВИЛ, Владата и Собранието повикаа на оставки и одговорност, а ОЈО допрва ќе оформува истрага по допрен глас. На здравје!
Несомнено, ДКСК сфатиле дека за дел од информациите што ЦИВИЛ ги побара ќе мора да се обратат и до Службата за општа и заеднички работи, секторот за финансии на Владата. Па така, по доставеното барање на 25 декември, за пет побарувања за информации од јавен карактер и со одговор на 18 јануари, конечно, на адресата на ЦИВИЛ, на 25 јануари пристигнува одговор од ДКСК.
ДКСК на ЦИВИЛ му приложи два годишни извештаи за 2015 и 2016 година, истите достапни и на нивата веб страница, како и информација за бројот на оформени предмети до 25 декември 2017 година.
Исто така, ги доставува и информациите добиени од Владата за уште три прашања на ЦИВИЛ, за вкупната висина на месечните примања на членовите на ДКСК, за висината на патните трошоци, по член на ДКСК и за вкупните репрезентативни трошоци, бидејќи нема евиденција за поединечни во периодот 2015-2017 година.
Што се однесува до информациите за награди, хонорари и бонуси и исплата за прекувремено работење, Владата нема евиденција, а очигледно ни ДКСК, со оглед на тоа дека истите ги побарала од надлежниот владин сектор.
ДКСК го известува ЦИВИЛ дека немала јавна набавка за комуникациска опрема во период од 2015-2017.
Но, она што ДКСК не го приложува, наспроти обврската за транспарентност, се ревизорските извештаи. Впрочем, на својата веб страница, ДКСК го објавува само Извештајот за ревизија од 2014 година.
Токму овие извештаи, за периодот 2015-2017 година, би одговориле на прашањата на ЦИВИЛ за „дополнителното“ трошење на јавни пари со кои располагала ДКСК за награди, бонуси, хонорари, прекувремено работење и патни трошоци.
Според информациите со кои располага ЦИВИЛ, системот за внатрешната финансиска контрола во ДКСК не функционира!
Постојат докази за ненаменско користење на буџетски средства, користење на приватни возила за „службени цели“, исплата на трошоци врз основа на неверодостојни и непотполни документи, односно бланко непотпишани патни налози. Понатаму, не постои евиденција за работното време само на Игор Тантуровски и членовите на ДКСК. Исто така, не постои процедура за користење средства за репрезентација.
Репрезентација
Едно од барањата на ЦИВИЛ се однесува на вкупната, но и поединечната сума за репрезентација по член на ДКСК. Одговорот од заедничките служби на Владата е дека не постои евиденција за поединечна, но вкупната сума изнесува 15.587 денари за 2015 г., за 2016 е 91.479 денари, а за 2017 г. е 17.122 денари. Да потсетиме, не постои процедура за користење средства за репрезентација, а тие биле исплаќани! Надвор од процедурите. Токму на тоа се однесува и забелешката од УЈП.
Неверодостојни патни налози – возило во лична сопственост за службени цели
Во ДКСК констатирана е еднократна исплата на надоместок од вкупно 330.226 денари на тројца членови на ДКСК во 2015 за ретроактивно направени трошоци и месечни исплати за еден член од вкупно 24.259 денари за 2016 година.
Од приложените патни налози се заклучува дека не се знае кога и зошто се потрошени тие пари, кој ги одобрувал исплатите и дали ги потрошиле парите што ги примиле. За нејаснотиите околу намената за трошење и да не говориме, бидејќи не се знае за што се трошеле тие пари, не постојат извештаи. Со оглед на фактот дека ваквите исплати се одлучени на Седница на ДКСК, одговорноста ја носи претседателот Тантуровски.
Вкупната сума од 24.259 денари е за исплатени, а не покриени 25 патарини во износ од 17.237 денари и вкупно 12.369 за службени патувања.
Ненаменски искористени буџетски средства
Од ревизијата заклучуваме дека двајца членови на ДКСК искористиле 32.310 денари за трошоци направени со сопствено возило.
Понатаму, се открива дека ненаменски средства се исплатени за закупнина на стан и комуналии на член на ДКСК, во износ од 168.818 денари. Односно, не постојат сметки за комунални услуги и приложената документација за закупнината, па така, произлегува дека членот на ДКСК месечно примал 350 евра, а исплаќал само 97 евра за закупнина.
И ресторанските сметки не се исклучок во несовесното работење на членовите на ДКСК. Тие поднесуваат дупли ресторански сметки и истите си ги исплаќаат. Така, неоправдани се ресторански сметки на Тантуровски, но, во овој дел, сепак, предничи Горан Миленков, еден од членовите на ДКСК.
Евиденција на полното работно време
За членовите на ДКСК не се знае дали воопшто доаѓаат на работа. Не постои евиденција за нив.
Од ревизорскиот извештај се гледа дека еден член на ДКСК во ист ден поднел пати налози за дневница за службено патување, патен налог за службено патување со сопствен превози патен налог за присуство на седница со сопствен превоз. Трите налози, временски не се поклопуваат, односно присуството на седницата и тргнувањето на службено патување.
И ова не е сѐ. Истражувачкиот тим на ЦИВИЛ ќе продолжи со анализите на документите со кои располага, а кои ДКСК не ги достави, иако за тоа има законска обврска.
Биљана Јордановска
