Турскиот парламент ги отстрани производите на Кока -Кола и Нестле од своите ресторани во вторникот поради нивната наводна поддршка за Израел среде конфликтот во Газа, објави The Financial express според официјалното соопштение и извор кој ги именуваше двете компании.
Од двете компании не одговорија веднаш на барањето за коментар.
„Производите на компаниите кои го поддржуваат Израел нема да се продаваат во ресторани, кафетерии и чајџилници во кампусот на парламентот“, соопшти Големото национално собрание на Турција, без да ги идентификува компаниите.
Спикерот Нуман Куртулмуш ја донел оваа одлука, се додава, со цел „да ја поддржи јавната чувствителност во врска со бојкотот на производите на компаниите кои отворено изјавија дека ги поддржуваат израелските воени злосторства (и) убиствата на невини луѓе во Газа“.
Собраниски извор рече дека пијалоците Кока-Кола и инстант кафето Нестле се единствените брендови отстранети од менијата, додавајќи дека одлуката треба да одговори на „огромното јавно негодување против овие компании“ поради поддршката на Израел.
Ниту во соопштението на парламентот ниту изворот не прецизираа како Кока-Кола и Нестле ги поддржаа воените напори на Израел.
Минатиот месец Нестле соопшти дека привремено затвора една од своите производствени погони во Израел како „претпазливост“, со што стана првиот гигант за производи за широка потрошувачка што објави одговор на војната.
Турските активисти во последните денови ги именуваа двете компании во објавите на социјалните мрежи кои повикуваат на бојкот на израелските стоки и западните компании за кои тие сметаат дека го поддржуваат Израел.
Потегот на турскиот парламент е меѓу првите на една влада или голема организација што ги таргетира големите светски брендови поради едномесечната војна меѓу Израел и палестинската милитантна група Хамас.
Исто така, на сосема друго место, граѓаните на Нови Пазар решија да ги поддржат жителите на Палестина со бојкот на сите производи на компанијата Кока Кола. Овој чин на солидарност започна откако градот беше преплавен со палестински знамиња, а рестораните едногласно се согласија да не служат американски пијалоци, додека граѓаните активно ја поддржуваат оваа иницијатива, пренесува Санџак данас.
Во текот на изминатиот месец, турскиот претседател Таип Ердоган и неговата влада остро го критикуваа нападот на Израел врз Газа и западната поддршка за Ерусалим
Израел ја бомбардира Газа по нападот на Хамас врз јужен Израел пред еден месец, кога неговите борци убија 1.400 луѓе и заробија 240 заложници.
Здравствените власти во Газа велат дека во нападот на Израел загинале повеќе од 10.000 Палестинци, вклучително и околу 4.100 деца.
Стотици илјади Турци излегоа на улиците за да протестираат против израелските операции во Газа во изминатиот месец, истовремено занемарувајќи го фактот дека слични операции изведува Турција врз Курдите во Ирак и Сирија.
Драган Мишев
