По трагите на неколку коментари на социјалните мрежи и медиумите, во кои се тврди дека ќерката на вицепремиерот Иван Стоиљковиќ, Сандра, наводно работи во еден од кабинетите во Кремљ, ЦИВИЛ побара одговор од вицепремиерот и министер за односи меѓу заедниците, Иван Стоиљковиќ, кој е во официјална посета на Република Србија, и според објавата на страната на министерството, остварил средба со претседателката на Народното собрание на Србија, Ана Брнабиќ.
Како што забележа Тимот на ЦИВИЛ за мониторинг на хибридни закани, (ЦХТМ), последниве денови, Фејсбук корисничка Дореана Христова, на својот профил, но и во коментари на повеќе фејсбук страници, интензивно пишува за улогата на вицепремирот и неговата ќерка во, како што ги нарекува, антимакедонска и антиевропска дејност.
Quo vadis секто вмро-дпмне????Ќерката на потпретседателот на македонската влада и министер за малцинства Иван Стоиљковиќ – Сандра Стоиљковиќ веќе работи кај кабинетот на рускиот портпарол на лична иницијатива од Путин и Песков (со одобрение на Сиљановска и Мицкоски).
Каде е шпионот Стоиљковиќ меѓу предвидените за сменување македонски министри, чија ќерка работи за Путин?????Ние граѓаните на Северна Македонија не сме ничии потчинети, најмалку на ветропирниот aвтократски бесрамник мицкоски и не му дозволуваме да ја гази македонската чест ни македонската држава кои тој решил да ги фрла на сталинистичкиот српски исвиркан режим на Вучиќ
Со самото влегување во македонската актуелна власт Стоиљковиќ активно се поврзува со српската власт на Вучиќ за време заедничките посети кај Путин. Во таа шпионска антимакедонска и антиевропска дејност Стоиљковиќ ја вклучува и ќерка си Сандра која веќе работи во кабинетот на рускиот портпарол. Стоиљковиќ врши насилна асимилација кај Македонците наметнувајќи им го српскиот празник Св.Сава кој никогаш не бил македонски. На европско, балканско и македонско ниво Ивaн Стоиљковиќ треба да се прогласи за persona non grata, заедно со премиерот на македонската влада Мицковски.
Забележливо е дека во своите коментари, таа освен Стоиљковиќ го прозива и премиерот Мицкоски, кој го поставил вицепремиерот на сегашната функција.
При пребарувањето на интернет, Тимот на ЦИВИЛ за мониторинг на хибридни закани, (ЦХТМ) дојде до информација објавена од еден медиум во јули, 2024година, според кој ќерката на вицепремиер Стоиљковиќ, познат по своите проруските ставови, наводно е „координатор на програми“ на Фондацијата Горчаков и активен член кој партиципира во сите поважни настани и пограми на Фондацијата која е основана со „благослов“ на рускиот претседател од страна на руското МНР, што може да се констатира и од објавата на руската амбасата во Северна Македонија.
Исто така, се наведува и дека Сандра Стоиљковиќ учествувала и на „Балкан дијалог“, настан кој Фондацијата го организира секоја година во различна држава од Балканот, каде се истакнуваат врските на балканските земји со Руската Федерација, а воедно, практично се регрутира и кадар кој ќе продолжи да шири руска пропаганда на Балканот (како што била пронајдена и ангажирана и Сандра Стоиљковиќ), според медиумот.
Дали и колку овие наводни се точни или неточни, очекувавме да потврди, или негира вицепремиерот Стоиљковиќ во одговор на прашањето кое му го испративме на маил.
Но, иако ЦИВИЛ Медиа, коректно и професионално упати новинарско прашање до Иван Стоиљковиќ со цел навремено и точно информирање на јавноста, вицепремиерот одговори на прашањето од ЦИВИЛ преку омаловажувачка објава на социјалните мрежи. Имено, наместо одговор на прашањето испратено по маил, вицепремиерот одбра да одговори преку објава на својот фејсбук профил.
Мојата ќерка Сандра Стоилковиќ во ноември 2023 запиша мастер студии за бизнис администрација на една од најпрестижните светски академии за бизнис менаџмент Сколково во Москва, кои што во јуни оваа година успешно ги заврши и се стекна со титула Мастер по бизнис администрација. Ова и е втора магистерска диплома, првата е од МГИМО и е тнр. црвена диплома, што значи дека била меѓу петте најдобри магистранти. Инаку од 2024 година таа работи како надворешен менаџер за бизнис партнерства во КОКОЦ ГРУП – меѓународна платформа за креирање на решенија за развој на меѓународен бизнис. Ова се јавно достапни информации и не ми е јасно кому и зошто му се потребни инсинуации. Ако е и од Цивил, премногу е, напиша Стоиљковиќ.
Притоа, самиот Стоиљковиќ потврдува дека неговата ќерка има блиски врски со Русија, магистрирајќи во држава агресор, предводена од диктаторот Путин, со која нејзиниот татко негува пријателски односи, и истовремено ја објавува содржината на прашањето испратено од ЦИВИЛ, со што самиот потврдува дека редакцијата постапила најкоректно и со професионални новинарски стандарди при испраќањето на прашањето.
Што е тогаш премногу од ЦИВИЛ за вицепремиерот во владата на Мицкоски?
Тоа што редакцијата сакаше да ја слушне и неговата страна, а не да ги пренесува објавите на социјалните мрежи еднострано. Што се случи, може да се види од приложеното. Сепак, имајќи ги предвид јавните ставови, постапките и политиките на вицепремиерот, не зачудува тоа што тој се одлучи на индиректна преписка со ЦИВИЛ преку социјалните мрежи, иако му беше упатен допис со коректно прашање. Имаме силна причина да веруваме дека начинот на кој одговори на прашањето од ЦИВИЛ, вицепремиерот Стоилковиќ, говори за тоа дека нему му пречи нешто друго кај ЦИВИЛ, а не прашањето за линковите на членови на неговото семејство со Русија.
Иако ЦИВИЛ му понуди простор да го каже својот став, наспроти наводите на социјалните мрежи, Стоиљковиќ одговори со ароганција и потпалувачка реторика, кое го сфаќаме како вршење притисок, и обид да се предизвика омраза кон ЦИВИЛ.
Нагласуваме: Никаков текст не беше објавен по ова прашање пред овој напад од вицепремиерот. Новинарските прашања не се напад, туку се јавен интерес.
Очигледно, на вицепремиерот Стоиљковиќ со ова ги покажува своите демократски и културолошки капацитети, креирајќи однос на притисок и замолчување на медиумите за јавно информирање, по теркот на неговите ментори од Србија и Русија, Александар Вучиќ и Владимир Путин.
Дали и целата влада на Северна Македонија, од која е дел и вицепремиерот Стоиљковиќ, (ќе) го следи ваквиот однос кон слободата на изразување?
Кој е всушност господинот Стоиљковиќ?
Вицепремиерот во владата на Христијан Мицкоски и претседателот на Демократската партија на Србите во Македонија, Иван Стоиљковиќ, во друштво на тогашниот директорот на српската Безбедносна-информативна агенција, Александар Вулин, како и тогашниот претседателот на Република Српска, Милорад Додик, учествуваше на Безбедносен форум во Русија, каде обраќање имал рускиот претседател Владимир Путин. Тој е често во друштво на рускиот амбасадор во земјава, Сергеј Баздникин, со кого, како што се пофали на Фејсбук, беше на одбележувањето на 113-годишнината од Кумановската битка на спомен-костурницата „Зебрњак“, каде исто така присуствуваше делегација од Република Србија предводена од државниот секретар во Министерството за труд и социјални и боречки прашања, Зоран Антиќ, а кој настан историчарите го сметаат за почеток на српската окупација на Македонија.
Претходно, Иван Стоиљкович се шаташе низ земјава во друштво на високи српски функционери, придружени со регуларни полициски и униформи на српска војска, претставници на српски боречки здруженија во паравоени униформи, додека на Кајмакчалан носејќи српско, црногорско и грчко знаме го прогласија „спрпското васкресење“, а кајмакчалан за „порта на Србија“, а српскиот министер за одбрана, Братислав Бата Гашиќ, поранешен директор на БИА (српската УДБА), во присуство на вицепремиерот во владата на Мицкоски тврдеше дека Кајмакчалан е српска земја.
Македонскиот вицепремиер и министер за Односи меѓу заедниците присуствуваше на комеморацијата на Денот на сеќавање на жртвите од бомбардирањето на НАТО врз СР Југославија во 1999 година што се одржа на аеродромот во Батајница крај Белград, во првиот ред покрај претседателот на Србија, Александар Вучиќ и босанскиот претседателот Милорад Додик, додека Додик му беше гостин на Стоиљковиќ на големиот српски празник Свети Сава, среде Скопје во МНТ, од каде ги нападна САД, ЕУ, НАТО- чија што членка е Северна Македонија-а сето тоа го слушаше премиерот Христијан Мицкоски од првиот ред.
Драган Мишев во соработка со Тимот на ЦИВИЛ за мониторинг на хибридни закани (ЦХТМ – CIVIL Hybrid Threats Monitoring Team)
