Во знак на револт поради сé уште неисплатената плата за декември, вработените во издавачката компанија „Медиа принт Македонија“, од трите дневни весници, „Утрински весник“, „Дневник“ и „Вест“, денеска излегоа пред објектот, за време на законската пауза. Претставниците на синдикалните организации на трите медиуми, вчера испратиле и писмено барање до менаџментот на МПМ, но не добиле одговор.
„Нé игнорираат. Бараме средба, бараме решение, инсистираме да ни се исплати декемвриската плата. Според потпишаните договори за работа, до 15 -ти следниот месец треба да ни биде исплатена платата за минатиот месец, во случајов, платата за декември требаше да ја добиеме најдоцна до 15-ти јануари. Утре почнува нов месец, а нема ни глас дека ќе добиеме плата. Тоа е причина што колегите, сите ние, законската пауза ја користиме како можност за демонстрирање на гневот и незадоволството“, вели Љубиша Станковиќ, претседател на Синдикатот на „Утрински весник“.
Тој додава дека и покрај огромниот револт на вработените, тие се професионалци кои доследно ја извршуваат својата работа.
Самостојниот синдикат на новинари на Македонија (ССНМ) ги поддржува вработените во МПМ, во напорот да ги остварат своите работнички права.
„ССНМ е во тек со сите случувања. Вработените се многу револтирани. Ова е спонтан израз на револт, зашто де факто, од јули наваму, секоја плата се добива ‘на мускули’, со преговор… Ние веќе не знаеме на кој договор да реферираме, бидејќи последниот договор беше дека нема да има доцнења, па пак имаше доцнења, повторно преговори… Ги поддржуваме вработените во нивните напори да ги остварат своите работнички права, согласно со законот“, вели Тамара Чаусидис, претседател на ССНМ.
ЦИВИЛ Медиа се обиде телефонски да го контактира менаџментот на МПМ, но добивме одговор дека одговорните тие се службено отсутни.
Oд МПМ не добивме одговор неодамна, ниту на прашањето за исплата на хонорарите на дописниците, на кои последен исплатен хонорар им е за јули.
Случувањата во МПМ беа повод и за Фејсбук-коментарот на економскиот аналитичар, Бранимир Јовановиќ.
„Нема подобра слика за Македонија денес, од протестот на новинарите на МПМ. На работниците не им се исплатени две плати, а газдата на компанијата е најбогатиот Македонец, близок до владејачката партија, претходно близок до претходната владејачка партија“, пишува економскиот експерт Јовановиќ, од Институтот за општествени и хуманистички науки во Скопје.
Според вработените, МПМ во ноември се обидела да ги редуцира кадрите на „Утрински весник“. Тогаш се огласи и ЗНМ, со реакција и барање да не се делат отказни решенија на вработените во овој дневен весник, што имаше значајна улога во процесот на креирање на јавното мислење во државата.
Моника Талеска
